Lirohen dy nga 5 të arrestuarit me heroinë

TIRANE - Gjykata e Tiranës liroi dje nga qelia dy nga pesë personat e arrestuar gjatë operacionit antidrogë, i koduar "BBM", të zhvilluar të premten pranë rrugës "Myslym Shyri", ku u bllokuan 1.2 kg heroinë dhe 2.1 kg kanabis çokollatë. Tre të tjerët do të hetohen në masën e sigurisë "arrest në burg", një prej të cilëve me afat 30- ditor. Seancat gjyqësore për caktimin e masave të sigurisë u zhvilluan në orët e paradites me dyer të mbyllura për publikun. Dy personat që lanë qelitë e paraburgimit janë Ervin Myftiu dhe Tomor Shqezi. Kërkesa e Prokurorisë për caktimin e masës "arrest në burg" me afat 30- ditor për ta nuk e bindi gjyqtaren e gatshme Arjana Liço, që caktoi për ta masën e "detyrimit për paraqitje" në organet e Policisë Gjyqësore. Për të arrestuarit Abdyl Musagaj dhe Nikolin Merko, gjykata pranoi kërkesën e prokurorisë për lënien e tyre në "arrest në burg". Po sipas kërkimit të prokurorisë, për të arrestuarin Fajton Baliti, gjykata caktoi masën "arrest në burg" me afat 30- ditor. Burime brenda sallave të gjyqit bënë me dije se avokatët kërkuan masa më të buta për klientët e tyre, duke pretenduar se prokuroria nuk kishte paraqitur një akt- ekspertimi që do të provonte se lënda e sekuestruar është drogë. Nga ana tjetër, përfaqësuesi i akuzës i ka kujtuar gjykatës që të dyshuarit kanë bërë rezistencë në momentin e ndërhyrjes policore. Njëri prej tyre tentoi të largohej me automjet, duke dëmtuar disa mjete të tjera të parkuara. Po ashtu, policia ka qëlluar disa herë në ajër, në shenjë paralajmërimi dhe vetëm pas këtij veprimi, kanë mundur ta neutralizojnë atë. Të dyshuarit Musagaj dhe Merko kanë precedentë të mëparshëm penale në fushën e narkotikëve.