Vdiq nga dhuna në dyqan, në gjendjen civile ende i gjallë
Gruaja e Agim Arapit: Dy javë i vdekur, s’e çregjistrojnë
Familja Arapi nga Durrësi, e cila humbi kryefamiljarin 15 ditë më parë, pas dhunës ndaj tij nga dy vëllezërit Ekonomi, po përballet me një tjetër problem, që ka të bëjë me çregjistrimin nga gjendja civile e viktimës.
Shkak për këtë është bërë një shënim që mungon në skedën e vdekjes ( vendi i vdekjes). Për këtë arsye, gjendja civile nuk merr përsipër të kryejë procedurat e çregjistrimit të 60- vjeçarit Agim Arapi, me argumentin se mjekoligjori që ka plotësuar skedën e vdekjes duhej të specifikonte vendin se ku kishte ndërruar jetë viktima. Bashkëshortja e të ndjerit, Vjollca Arapi, tregon peripecitë që po has për të kryer çregjistrimin e kryefamiljarit, i cili 15 ditë pas vdekjes, rezulton i gjallë në gjendjen civile.
Znj. Vjollca, bashkëshorti juaj është ende gjallë në gjendjen civile, pse nuk është çregjistruar?
Bashkëshorti im është gjallë në gjendjen civile, pasi nuk është kryer çregjistrimi i tij. Kjo nuk ka ndodhur për fajin tonë si familje. Ne jemi interesuar dhe po përpiqemi të mbledhim dokumentacionet e nevojshme për të kryer çregjistrimin, pasi bashkëshorti u bë 15 ditë që ka ndërruar jetë nga një sulm barbar i dy vëllezërve Ekonomi, në bashkëpunim me dhëndrin e tyre, Jurgen Kurti, i cili për mua është autori kryesor i vrasjes së bashkëshortit tim.
Ku qëndron problemi që nuk bëhet çregjistrimi nga gjendja civile?
Isha ditën e premte te zyrat e gjendjes civile, në lagjen Nr. 3, për të kërkuar që të çregjistrohej bashkëshorti, por punonjësja atje nuk pranoi të kryente procedurat me dokumentacionin që unë disponoja. Me të drejtë, më kërkoi që te skeda e vdekjes duhej të ishte përcaktuar vendi ku viktima kishte ndërruar jetë.
Në skedën e vdekjes nuk është specifikuar ku ka ndërruar jetë bashkëshorti juaj?
Fatkeqësisht, jo. Mjekoligjori nuk ka përcaktuar vendin se ku ka ndërruar jetë bashkëshorti im dhe ky fakt bëhet pengesë për të kryer procedurat e çregjistrimit. Punonjëset e gjendjes civile nuk pranojnë skedën pa u përcaktuar vendi ku ka vdekur bashkëshorti im. Madje ka edhe pasaktësi të tjera në skedën e vdekjes. Gabim është gjithashtu edhe ora e vdekjes.
Jeni konsultuar me mjekun ligjor që ka lëshuar ( plotësuar) skedën e vdekjes, pse këto pasaktësi?
Pasi punonjësja e gjendjes civile më kërkoi të përcaktohej vendi ku bashkëshorti im kishte ndërruar jetë, shkova menjëherë te mjeku ligjor, i cili ka plotësuar skedën e vdekjes. I them: "Ma specifiko të lutem vendin ku ka ndërruar jetë bashkëshorti im, sepse nuk marrin përsipër punonjëset e gjendjes civile të kryejnë procedurat për çregjistrim". M'u përgjigj shumë keq: "Në rregull e ke atë që të kam dhënë, s'të jap gjë tjetër". "Ma kërkojnë me patjetër, se nuk më çregjistrojnë burrin", i them. "Ik më lër rehat, se s'të jap tjetër", më tha dhe u hodh menjëherë në sulm duke më thënë se po e kërcënoja.
Pse mendoni se nuk e ka përcaktuar vendin e vdekjes eksperti mjekoligjor?
Unë jam e bindur që për të manipuluar ngjarjen. Ai ka lëshuar dy skeda, një që përcakton ( skeda me Nr. 925) se viktima ka ndërruar jetë si pasojë e goditjeve që ka marrë nga mjete të forta dhe mjete të mprehta, ndërsa në skedën me Nr. 798 thuhet se nuk dihen shkaqet e vdekjes.
Ju mendoni se po manipulohet ngjarja?
Që në fillim është tentuar dhe është realizuar të deformohet dinamika e kronologjia e ngjarjes. Jurgen Kurti ka dalë nga burgu me skedën me Nr. 798, që thuhet se nuk dihen shkaqet e vdekjes. Për mua ai është autori kryesor i ngjarjes dhe shihet qartë në kamerat e sigurisë se ka marrë pjesë në sulmin barbar që kishte nisur vjehrri i tij me të vëllanë. Ai është lënë i lirë, ndërkohë që duhej të ishte pas hekurave bashkë me dy të tjerët.
Si do të veproni tani? Cili është apeli juaj?
Unë i bëj apel ministrit të Drejtësisë që ta shikojë me vëmendje këtë ngjarje, sepse po deformohet qëllimisht. I bëj thirrje ministrit të Shëndetësisë të hedhë sytë te mjekët që po shpërdorojnë hapur detyrën. Për shkak të papërgjegjshmërisë së mjekut ligjor, unë duhet të paguaj gjobë për të çregjistruar bashkëshortin nga gjendja civile.