Të përndjekurit, 3 muaj afat për trashëgimtarët
Financat publikojnë listën e trashëgimtarëve të të përndjekurve që përfitojnë nga fondi 6 milionë USD. Familjarët kanë tre muaj afat për dokumentet
Vetëm 3 muaj afat do të kenë në dispozicion trashëgimtarët për të dorëzuar dokumentet që nevojiten pranë Drejtorisë së Pagave dhe Dëmshpërblimeve.
Kjo vlen për familjarët e rreth 105 dosjeve, të cilat ende nuk kanë përfituar këstin e dytë. Ministria e Financave ka publikuar dje emrat e përfituesve që duhet të plotësojnë dosjen, në mënyrë që të nisë edhe ndarja e pagesave.
DOKUMENTET Përkundrejt të dënuarve që jetojnë, të cilët mjaftohen duke dorëzuar vetëm certifikatë familjare dhe numër llogarie, lista e kërkesave për trashëgimtarët është më e gjatë. Nga këta të fundit për lëvrimin e çdo kësti kërkohet: kopje e letërnjoftimit, numër llogarie, certifikatë vdekjeje, certifikatë e trungut familjar, dëshmi trashëgimie dhe prokurë. Sipas Ministrisë së Financave, certifikata e vdekjes është kusht ligjor për shpërndarjen e dëmshpërblimit dhe nuk zëvendësohet me vendim gjykate që shpall të vdekur individin. E njëjta gjë vlen edhe për certifikatën e trungut të familjes, e cila nuk mund të zëvendësohet me certifikatë negative të lëshuar nga zyrat e Gjendjes Civile. Nga ana tjetër, nëse nuk ka një përfaqësues me prokurë, procesi ndërlikohet edhe më tepër, pasi duhet që për në ndarjen e çdo pagese të gjithë përfituesit e radhës së parë dhe të dytë që kanë aplikuar të kenë bërë dorëzimin e dokumenteve. Në të kundërt, dosja mbetet e bllokuar. Është pikërisht kjo një ndër arsyet, krahas pamjaftueshmërisë së fondit, ajo që ka sjellë ngadalësim të procesit për këtë kategori.
AFATET Gjithsej janë 450 dosje të patrajtuara me këst të dytë. Deri në fund të muajit korrik, trashëgimtarët e tyre do të kenë afat për të bërë plotësimin e dosjes. Nëse kjo nuk ndodh, atëherë fondi vjetor do të përdoret për ndarjen e këstit të tretë. Të paktën kjo është ajo çka komunikohet nga burime pranë Ministrisë së Financave. Këtë vit janë 6 milionë dollarë që do të përdoren për këtë kategori. Ndërkohë, sa i takon kategorisë parësore, po vijon puna për ndarjen e këstit të shtatë. Me fondin e këtij viti pritet të përmbyllet kapitulli i dëmshpërblimit për ata të dënuar që janë gjallë. Kur kjo të ndodhë, i gjithë fondi vjetor që vendoset në dispozicion nga buxheti i shtetit do të transferohet për t’u përdorur për trashëgimtarët.