Basha: Vullnet për dialog, por vetëm me qeveri teknike

Bllokimi i rrugëve, kreu i PD: Paralajmërimi i parë, zgjedhje pa opozitën s’ka për të pasur

Kreu i opozitës, Lulzim Basha, deklaroi nga çadra e protestës se nuk do të lejohen zgjedhje pa Partinë Demokratike.

Pas protestës me bllokimin e akseve rrugore, Basha tha se opozita është e gatshme për të dialoguar për zgjidhjen e krizës së thellë, por nuk tërhiqet nga kushti i qeverisë teknike dhe zgjedhjeve të lira. “Nuk na mungon aspak vullneti dhe vendosmëria për ta zgjidhur krizën e thellë politike përmes një dialogu me kundërshtarët tanë politikë. Dialog që ka vetëm një temë; qeverinë teknike dhe mandatin e kësaj qeverie për zgjedhje të lira e të ndershme. Por edhe nëse ky vullnet mungon nga ana tjetër, sot kanë vetëm provën e parë, vetëm paralajmërimin e parë. Se, në këtë vend, zgjedhje pa opozitën nuk ka për të pasur kurrë. Votime të diktuara nga krimi, droga dhe qeveria e kapur prej tyre nuk do të lejojmë. Kjo është kategorike dhe e pandryshueshme”, tha dje Basha.

PROTESTA Më herë gjatë paradites kryetari i PD, pas mbylljes paqësore të protestës, e cila bllokoi për 1 orë akset kryesore të Shqipërisë, ka deklaruar se kjo ishte një paralajmërim për maxhorancën që të pranojë qeverinë teknike. Basha, i cili ishte në krye të protestuesve në rrethrrotullimin te sheshi “Shqiponja” në Tiranë, tha dje se kjo protestë kishte për qëllim të tre- gonte vendosmërinë e opozitës për të realizimin e zgjedhjeve të lira dhe të ndershme. Kreu i opozitës përmendi gjatë këtij tubimi dhe vetingun, duke thënë se ai do të miratohet sipas marrëveshjes së dakordësuar më 22 korrik. “Jemi të bashkuar në këtë lëvizje kombëtare dhe europiane, të bashkuar në vendosmërinë tonë për të mos ia dorëzuar Shqipërinë krimit dhe drogës, për të mos ia dorëzuar lirinë tonë tiranisë së korrupsionit dhe të krimit në pushtet, por të përbashkuar, siç jemi bashkuar, qindra mijëra shqiptarë, miliona shqiptarë nga jugu në veri, nga lindja në perëndim; për zgjedhje të lira dhe të nder- shme, me një qeveri teknike, e cila do të largojë kriminelët nga institucionet, sipas ligjit të dekriminalizimit, që do të luftojë me të vërtetë drogën dhe paratë e drogës, që do të krijojë kushtet për zgjedhje të lira dhe të ndershme, përfshirë votimin biometrik dhe numërimin elektronik të votës së çdo shqiptari e çdo shqiptareje dhe, menjëherë pas kësaj, votimin dhe zbatimin e vetingut dhe Reformës në Drejtësi, sipas përcaktimeve kushtetuese dhe marrëveshjes politike të 22 korrikut”, tha dje kreu i opozitës. Më tej, Basha ftoi protestuesit që të largohen me qetësi, pa iu përgjigjur provokimeve të mundshme.