Opozita kërkon President nga populli

Kryetari i PD- së, Lulzim Basha, propozoi pak ditë më parë zgjedhjen e Presidentit nga populli, si përgjigje të ofertës së maxhorancës që ta zgjedhin Presidentin e ri me pjesëmarrjen e opozitës. “Na kanë ftuar këtë javë për punën e Presidentit! - tha Basha në çadrën e protestës. – “Ne i kemi votat, po hajdeni ta bëjmë me konsensus! Ne i kemi paret, po hajde ta blejmë bashkë!” – Sikur po blejmë ndonjë viç për drekë?! Pse, i kujt është Presidenti? I Ramës, i Metës, apo i Bashës? Ndaj dhe oferta ime është: të zgjedhim President nga populli! Ndaj ju japim vetëm një dhe vetëm një ofertë: ta ndryshojmë Kushtetutën dhe ta zgjedhë populli shqiptar!”, tha Basha gjatë fjalës së tij në çadrën e opozitës. Mungesën e përgjigjes për këtë propozim, kreu demokrat e quajti pazar mes Ramës dhe Metës. “24 orë pas këtij propozimi, dhe Rama dhe Meta kanë heshtur. Në pazaret e tyre gjithçka për pasurinë dhe pushtetin, por asgjë për qytetarët. Ne nuk pranojmë pazar me postin e Presidentit të ri”, tha Basha.