Basha pas votimit të paktit PD- PS: Fitore e qëndresës

Kreu i opozitës, Lulzim Basha, i ka konsideruar një fitore për Republikën e re ndryshimet e miratuara të hënën në seancë plenare për shitblerjen e votës. “Dënime të rënda i presin tani matrapazët e zinj të blerjes së votës, kriminelët e rrugës dhe ata në poste shtetërore, që kërcënojnë apo detyrojnë me forcë qytetarët të votojnë kundër vullnetit të tyre, komisionerët, numëruesit dhe punonjësit zgjedhorë që manipulojnë votimin dhe numërimin e votave. Policët dhe ushtarakët, të cilët në vend që të mbrojnë të drejtat e qytetarëve dhunojnë të drejtën e shenjtë të votës, punonjësit e shtetit që paratë dhe pasuritë që u takojnë qytetarëve i vënë në shërbim të partisë”, deklaroi Basha. Sipas kreut të opozitës, qëllimi i demokratëve për zgjedhje të lira dhe të ndershme u arrit përmes vendosmërisë së treguar gjatë qëndresës 90- ditore. Basha u shpreh i bindur në punën e ndershme që do të bëjnë të gjithë ministrat teknikë të propozuar nga PD- ja.“Me forcën dhe vendosmërinë që treguam 90 ditët e qëndresës sonë historike, ne do të bëhemi barrierë ndaj kriminelëve zgjedhorë që ata të mos guxojnë të dhunojnë lirinë e votës, sepse do të humbasin lirinë e tyre. Puna e ndershme dhe kurajoze e ministrave teknikë, drejtimi i paanshëm i KQZsë, kufizimi i shpenzimeve zgjedhore dhe masat e tjera që po ndërmarrim për zgjedhje të lira dhe të ndershme, do t’u japin qytetarëve mundësinë dhe garancitë që të zgjedhin lirisht qeverinë që ata duan t’i drejtojë. Koha e maskarenjve po mbaron. Tani është koha për Republikën e re, Republikën e lirisë dhe demokracisë së vërtetë”, tha Basha.