Dëshmia e të plagosurit: Më sulmuan edhe mua barbarisht

Për shkak se vetëm njëri nga tre personat e përfshirë ka mbetur gjallë, ai është i vetmi që mund të japë versionin e tij mbi atë që ka ndodhur mesditën e djeshme në Rrushkull ( fshat bregdetar rreth 30 kilometra në veri të qytetit bregdetar të Durrësit). Gjatë deklarimeve të para për hetuesit E. Xhaferri ( shef i dy personave që mbetën të vdekur nga goditjet me thikë), ka hedhur poshtë pretendimet e policisë. "Unë isha larg. Kur u afrova gjeta të plagosur rëndë Yzeirin. Ndërkohë Lulëzimi më sulmoi barbarisht edhe mua. Unë nuk kam qëlluar mbi Lulëzimin. Nuk mbaj mend asgjë më tepër. Vetëm kur e pashë veten në spitalin e Durrësit. Lulëzimi ishte me probleme mendore dhe shpeshherë bëhej agresiv pa arsye me punëtorët e tjerë. Nuk di çfarë të them, sepse nuk mbaj mend asgjë më tepër", është shprehur shkurtimisht për hetuesit përgjegjësi E. Xhaferri, i cili mbeti i plagosur rëndë pas përleshjes me thika. Ndërkohë, burime nga Policia e Durrësit thanë se ngjarja po hetohet për të dokumentuar se çfarë ka ndodhur konkretisht, si ka nisur sherri mes tyre dhe cili është autor i krimit.