Bie kërkesa e Shullazit për gjyqtarin
TIRANE – Gjykata për Krimet e Rënda nuk pranoi kërkesën e Emiliano Shullazit dhe katër të bashkëpandehurve të tij për përjashtimin e një prej pesë anëtarëve të trupit gjykues. Sipas Gjykatës, kërkesa e të pandehurve për përjashtimin e gjyqtarit Bib Ndreca ishte e pambështetur në ligj dhe në prova. Kërkesa për largimin e gjyqtarit nga pesëshja gjykuese u artikulua në seancën e 10 majit, e para në procesin gjyqësor ndaj Shullazit dhe miqve të tij. Në atë seancë, përmes mbrojtësve të tyre të pandehurit pretenduan se gjyqtari Ndreca ishte në kushtet e papajtueshmërisë ligjore për të marrë pjesë në proces, për shkak se ai kishte marrë pjesë në procesin për sigurimin e provës, marrjes së dëshmisë së Ylvi Beqjes. Nga ana tjetër, Krimet e Rënda e patën të pamundur dje të zhvillonin seancën e radhës të gjykimit në themel për Shullazin dhe të bashkëpandehurit e tij, Gilmando Dani, Blerim Shullazi, Endrit Qyqja dhe Endrit Zela. Shkak u bë mungesa e një prej mbrojtësve në proces. Për këtë shkak trupi gjykues vendosi të shtyjë seancën për në 31 maj. Të pandehurit e kësaj dosjeje akuzohen për “kanosje për shkak të detyrës”, kryer në bashkëpunim, “shtrëngim me anë të kanosjes për dhënie pasurie”, në bashkëpunim, në formë grupi dhe “grup të strukturuar kriminal”. Prokuroria për Krimet e Rënda pretendon se të pandehurit janë pjesë e një grupi kriminal, të cilët kanë kanosur kandidatin për rektor të Universitetit të Tiranës, Mynyr Koni dhe ishrektorin Dhori Kule, si dhe për “gjobitjen” e tre biznesmenëve.