Mesazhi i këngëtares: Jam thyer
Ariana Grande tha se ishte e thyer dhe shumë e trishtuar, pasi 22 njerëz humbën jetën dhe 59 të tjerë u plagosën në sulmin terrorist të hënën në mbrëmje në "Manchester Arena" në Mançester, Angli. Këngëtarja 23- vjeçare ka shkruar në një mesazh emocional në "Twitter": "E thyer. Nga thellësia e zemrës, me vjen kaq shumë keq. Nuk kam fjalë". Menaxheri i Arianës, Scooter Braun, tha pas sulmit se "Sonte zemrat tona janë të thyera. Fjalët nuk mund ta shprehin keqardhjen për viktimat dhe familjet e lënduara në këtë sulm pa kuptim. Ne vajtojmë jetët e humbura të fëmijëve dhe të të dashurve të tyre". Ai falënderoi autoritetet e Mançesterit për reagimin e shpejtë. "Ju kërkojmë të gjithëve që të keni në zemrat dhe lutjet tuaja viktimat, familjet e tyre dhe të gjithë të prekurit nga sulmi". Ariana ka pezulluar koncertet e saj në Europë. Sipas disa mediave, ajo nuk është në gjendje të performojë në koncertin që ishte planifikuar për të martën në mbrëmje, në Londër. Pas Anglisë, Grande do të performonte në Belgjikë, Poloni, Gjermani dhe Zvicër.