Instalacione në poliqendra, Veliaj: Gjenerojmë evente

“Reja” nuk do të jetë instalacioni i vetëm i Tiranës. Një tjetër vepër e artit modern e ideuar nga arkitekti italian Stefano Boeri do t’i shtohet një prej poliqendrave të qytetit. Këtë e bëri publik kryebashkiaku Erion Veliaj në aktivitetin e organizuar në 1- vjetorin e vendosjes së instilacionit “Reja”. “Tirana do të ketë një instalacion tjetër që quhet ‘ Radura’. Është një instalacion, me të cilin grupi ‘ Boeri’ dhe shumë prej artistëve italianë kanë punuar në Itali dhe shumë shpejt do ta kemi në Tiranë. Do të jetë një tjetër koncept, por kësaj here jo me metalin dhe konfigurimin e ‘ Resë’, por duke përdorur elementë të drurit. Besoj do të krijojmë një pineskë tjetër në trupin e qytetit që me shpresë do të gjenerojë gjithashtu shumë evente”. Pesë poliqendrat e qytetit, sipas planit të ri, do të kenë sipas veliajt instalacione të ngjashme me “Renë”. “Do të përzgjedhim disa vepra në qytet, sidomos në zonat e reja të qytetit siç është ‘ Bulevardi i Ri’ dhe disa hapësira të tjera që po i zhvillojmë për t’u siguruar që nuk është vetëm qendra e Tiranës ajo që multiplikohet me aktivitete kulturore e artistike, por që edhe këto poliqendra, përveç se t’i konceptojmë si qendra administrative e kulturore”, nënvizoi kryetari. Në harkun kohor të një viti në stacionimin e “Resë” përpara ambienteve të “Ekspozitës” janë zhvilluar 150 aktivitete publike, shifër e konsideruar rekord. “A ka ndonjë institucion tjetër që të ketë bërë 150 aktivitete në vit pa asnjë lekë?! Kjo është fuqia e gjësë së bukur”.