Kafshët e punës "thyejnë" kufirin e gjelbër, sekuestrohen 10 kuaj

KORÇE- "Todorica" është koduar operacioni antikontrabandë i Policisë së Korçës për sekuestrimin e 10 kuajve që ishin sjellë nga kufiri i gjelbër. Blutë arrestuan tre persona, të cilët dyshohet se në bashkëpunim mes tyre dhe në mënyrë të përsëritur kanë kontrabanduar ilegalisht nga kufiri i gjelbër kafshët e punës. "Specialistët e sektorit për Hetimin në Drejtorinë Vendore të Kufirit e Migracionit Korçë kanë finalizuar me sukses operacionin ' Todorica', në kuadër të të cilit u bë kapja dhe arrestimi në flagrancë i shtetasve Ilir Meka, 46 vjeç, Anis Meka, 23 vjeç, ( atë e bir) të dy banues në fshatin Rakickë- Devoll dhe Elton Bylykbashi, 32 vjeç, banues në fshatin Zvezdë. Arrestimi i tyre u bë në kuadër të një procedimi penal, i cili është ndjekur me metoda speciale të hetim- it, ku nga kryerja e veprimeve hetimore lidhur me këtë rast rezulton se shtetasit e mësipërm, në vendin e quajtur ' Lugina e Todoricës', në Pustec, kanë kontrabanduar ilegalisht 10 kafshë pune ( kuaj), të cilët janë gjetur e sekuestruar nga shërbimet e Policisë Kufitare më datë 18.05.2017 në vendin e lartpërmendur", thuhej në njoftimin e dhënë nga Policia. Nga verifikimet e kryera rezulton se këtë vepër penale tre shtetasit e mësipërm e kanë kryer në mënyrë të përsëritur, duke bashkëpunuar me njëri- tjetrin. Materialet i kaluan Prokurorisë të Rrethit Gjyqësor Korçë për veprën penale "kontrabanda me mallra të tjera" parashikuar nga neni 174/ 2 i Kodit Penal. Burime të Policisë nuk përjashtuan dyshimin se kafshët e punës do të përdoreshin për trafik të mundshëm.