Ora e bizhuteri me diamante, ndalohen në port dy italianë
Tentuan të shmangnin doganën: Do të testonim tregun shqiptar
Tentuan të shmangnin tarifat doganore, duke futur në territorin shqiptar nëpërmjet Portit të Durrësit sende me vlerë ( bizhuteri), arrestohen dy italianët që kishin për qëllim shitjen e tyre në vendin tonë.
Policia e Durrësit ka nisur procedimin penal për dy shtetas, pasi nuk kanë deklaruar gjatë kontrollit në Pikën Kufitare një sasi të konsiderueshme të sendeve me vlerë. Bëhet me dije se ka filluar procedimin penal në ngarkim të shtetasve F. D., 34 vjeçe, banuese në Palermo dhe P. C., 39 vjeç, banues në Bisceglie, Itali. Në bashkëpunim me njëri- tjetrin, 34- vjeçarja dhe bashkëpunëtori i saj u përpoqën të kalonin në mënyrë të paligjshme sendet me vlerë, me qëllim për t'iu shmangur detyrimit doganorë. Bizhuteritë ata i kishin futur në valixhe të vogla dore, me idenë se nuk do të kontrolloheshin im- tësisht në kufi. Mirëpo, agjentët kanë krijuar dyshime te dy shtetasit italianë dhe pas kontrollit gjetën e sekuestruan në cilësinë e provës materiale një sasi të konsiderueshme bizhush si: varëse, ora të markave të ndryshme, unaza me gurë diamanti etj. "Më datë 26.05.2017, gjatë kontrollit të ushtruar në P. K. K. Durrës u gjetën dhe sekuestruan në cilësinë e provave materiale një sasi e konsiderueshme mallrash me vlerë si: ora të markave të ndryshme, varëse me ngjyrë floriri me gurë si ato të diamantit, byzylyk me ngjyrë si ato të floririt, unaza me gurë si ato të diamantit, vathë me ngjyrë si ato të floririt, si dhe me ngjyrë të bardhë dhe me gurë si ato të diamantit. Sendet e sekuestruara, shtetasit e proceduar nuk i kishin deklaruar në doganë", sqaron Policia. Dyshohet se malli do të tregtohej në vendin tonë, ndërsa mësohet se dy personat kishin faturat blerëse, por tentuan të evitonin zhdoganimin e tyre, me qëllim për të mos paguar tarifën doganore. Ata akuzohen për veprën penale "mosdeklarimi në kufi i të hollave dhe i sendeve me vlerë". "Nuk kishim për qëllim për të kaluar pa doganë dhe në mënyrë të kundërligjshme mallin në Shqipëri. Ne nuk dinim ku të shkonim dhe të kryenim procedurat, pasi kishim mungesë informacioni. Nuk kishim arsye të mendonim t'u shmangeshim tarifave doganore, pasi për mallin ne kemi faturat blerëse. Nuk njohim njeri këtu në Shqipëri, erdhëm për të testuar tregun", janë shprehur shkurtimisht shtetasit italianë, ndërsa kanë kërkuar avokatë dhe përkthyes për t'u përballur me policinë.