Çmimi “Kadare” shkon në Kosovë, Viron Graçi del kundër jurisë
Musa Ramadani, shkrimtari e poeti nga Gjilani, u përzgjodh më i miri, në garë të fortë me Vrion Graçin
Shkrimtari nga Kosova, Musa Ramadani, është fituesi i çmimit "Kadare" me romanin e tij "Profeti nga Praga". Për të tretin vit u nda çmimi letrar, i organizuar nga Instituti Europian "Pashko", me mbështetjen e Universitetit Europian të Tiranës.
Ceremonia u zhvillua gjatë Ditëve Letrare të Razmës, ku u zhvillua edhe një konferencë shkencore mbi raportin e letërsisë me kujtesën, organizuar nga Departamenti i Komunikimit dhe Marrëdhënieve me Publikun të Universitetit Europian të Tiranës. Por pa dyshim kulminacioni i këtij aktiviteti ishte ndarja e çmimit "Kadare". Juria e përbërë nga Bashkim Shehu, kryetar, Ylljet Aliçka, Mirela Oktrova, Ledia Dushi e Agim Baçi, pas një pune të gjatë seleksionuese, duhej të vendosnin mes 6 veprave finaliste. Këto të fundit u seleksionuan mes 36 dorëshkrimeve nga autorë të ndryshëm nga të gjitha trevat shqipfolëse, që u dorëzuan gjatë muajve të aplikimit për këtë çmim. Pas një debati të gjatë mes anëtarëve të jurisë, mes veprave të dy autorëve, Vrion Graçit dhe Musa Ramadanit, me një raport 3 me 2, u shpall fitues ky i fundit. Ky çmim shoqërohet nga një vlerë monetare prej 10 mijë eurosh, përveç botimit të veprës nga Botimet Mapo. Vepra e Musa Ramadanit, "Profeti nga Praga", u konsiderua nga juria si një roman të veçantë si për nga forma, ashtu dhe nga përmbajtja. "Duke qenë i strukturuar në tregime të lidhura fort me njëratjetrën, ' Profeti nga Praga' shpërfaqet si një mozaik rrëfimesh dhe kolazh teknikash narrative. Një roman për letërsinë, si tekst kënaqësie dhe akt përjetësie, ku krijuesi shpaloset si një libër i hapur ndaj konteksteve dhe konotimeve të ndryshme". Ceremonia e dhënies së çmimit "Kadare" 2017 do të zhvillohet në ditët në vazhdim në Universitetin Europian të Tiranës. KUSH ËSHTË MUSA
RAMADANI: Musa RAMADANI ( 1944) u lind në Gjilan të Kosovës. Ishte fare fëmijë, kur bashkë me familjen u deportua në Prizren, ku ka përfunduar një pjesë të shkollimit fillor, për ta vazhduar më pas në Gjilan. Ka përfunduar studimet në Shkollën e Lartë Pedagogjike - Dega e Letërsisë dhe e Gjuhës shqipe në Prizren. Nga viti 1965 ka qenë gazetar, recensent teatror dhe redaktor i rubrikës së kulturës në gazetën "Rilindja". Shkrimet e para i botoi te revista "Jeta e Re" dhe te javorja "Zëri i Rinisë". Çmimi i parë për poezi dhe ai i dyti për prozë, në konkursin letrar të zhvilluar në vitin 1968 në Kosovë, e motivuan që t'i përkushto- het letërsisë. Ka botuar vëllimet poetike: "Mëkatet e Adamit" ( 1969), "Thirravaje" ( 1971), "Neurosis" ( 1973), "Muzat nuk flenë" ( 1976), "Alfabeti i neurozave" ( 1982), "Eugjenika e tri deteve" ( 1986), "Nostalgjia antike" ( 1990) dhe "Mëkatet e E( ha) vës" ( 2010), si dhe veprat në prozë "Romani pa Kornizë", roman ( 1975), "Fluroma", tregime ( 1978), "Zezona", roman ( 1978), "Ligatina", roman ( 1983), "Satana ma vodhi gurin e urtisë", tregime ( 1987), "Vrapuesja e Prizrenit", roman ( 1995), "Antiprocesioni", roman ( 1997), "Inamor: 55", minitregime ( 2000). Në 1984 botoi dramën "Moisiu në Unazën e Inflandit", e cila u inskenua në Teatrin e Gjakovës dhe atë të Prishtinës. Ka botuar edhe dy libra eseistikë: "Fjala në skenë" ( 1980) dhe "Premiera shqiptare" ( 1994). Përkthimi ka qenë një tjetër pasion i tij, duke sjellë në shqip autorët Dino Buxati, Sadek Hedajat, Hajner Myler, Per Lagerkvist, Jashar Kemal, Jezhi Andzhejvevski etj.