Basha pas vizitës në spital: Të gjenden autorët, kudo qofshin
Kryetari i opozitës, Lulzim Basha, ka qenë një nga pacientët që ka qëndruar më gjatë në Qendrën Spitalore “Nënë Tereza”, për shkak të dëmtimeve të konstatuara nga mjekët pas mitingut të PD-së. Njerëz të afërt të kreut të PD- së konfirmojnë se Basha i ka ndier simptomat në orët e mbrëmjes së ditës së shtunë. Gjithashtu, edhe njerëzit që bëjnë pjesë në grupin e sigurisë pranë tij, kanë shfaqur simptoma të skuqjes së fytyrës dhe lotim nga sytë. Pas kësaj, kreu i PD- së i është drejtuar Qendrës Spitalore “Nënë Tereza”. Basha ka qëndruar përgjatë gjithë natën në spital ditën e shtunë dhe mëngjesin e së dielës është larguar QSUT. Por, pavarësisht se doli nga spitali, gjendja e kreut të PD- së nuk ka qenë e mirë, ndaj edhe ai ka anuluar të gjitha takimet e zhvilluara paraditen e djeshme. Në një reagim për mediat lidhur me këtë ngjarje, Basha u shfaq sërish me simptoma të skuqjes së syve. Duke siguruar se ajo që ndodhi nuk lidhej me tullumbacet që u hodhën, Basha kërkoi që të dalin përgjegjësit kushdo qofshin, duke mos përjashtuar as elementë pranë forcës së tij politike. “Kam folur me shumë prej të prekurve, fatmirësisht efektet janë anësore dhe të përkohshme, joserioze dhe të gjithë janë të vendosur. Të gjithë e dimë që kjo nuk ishte një tullumbace. Ndërsa presim zbardhjen dhe vënien para përgjegjësisë të autorëve, kushdo qofshin ata, po bëjmë edhe analizën tonë. Kjo nuk ishte tullumbace. Por unë mund t’ju them se është detyra e autoriteteve shtetërore të vendosin para përgjegjësisë autorët, kushdo qofshin. Nëse nuk ndodh, kjo është një tjetër provë e gjunjëzimit total të shtetit. Ne do të bëjmë analizën tonë. Ne nuk do të ndalim. Unë do të vazhdoj fushatën sonte në orën 19: 00, në mitingun hapës në qytetin e Fierit. Asgjë nuk do të më ndalë mua dhe opozitën e bashkuar drejt fitores”, deklaroi Basha.