Basha nis fushatën, fton Ramën në debat TV
“Mos trego barcaleta, por eja në debat e bëj bilancin”
Kreu i PD- së, Lulzim Basha, ftoi dje nga Fieri Kryeministrin Rama në një debat televiziv për të bërë bilancin e qeverisë së drejtuar prej tij në 4 vite. Sipas Bashës, Kryeministri nuk mund t’i kalojë 4 javët e fushatës duke treguar barcaleta në të gjithë vendin, por duhet që të dalë në një debat televiziv për të përballur programet e dy forcave politike. “Sonte e ftoj këtu nga Fieri për një debat televiziv me kandidatin për Kryeministër të Republikës së re. Edi Rama mund të shëtisësh në Shqipëri duke treguar barcaleta, por nuk i çon dot katër javë me barcaleta. Eja në debat, bëj bilancin tënd, unë bilancin tim. Ti programin tënd, unë programin tim dhe qytetarët të vendosnin me votën e tyre. Ftesën e bëra publike. Po s’e pate dëgjuar, po ta nis edhe me shkrim”, tha Basha, në çeljen e fushatës për qarkun e Fierit. Basha u shpreh i bindur se ka programin që do të zhvillojë ekonominë e shqiptarëve. “Unë nuk do të jem kryeministri i palmave. Unë nuk do të jem kryeministri i shatërvanëve. Nuk do të jem kryeministri i ekspozitave. Nuk do të paguaj kurrë 900 euro palmën, kur me ato para mund të ushqejmë 10 familje në ndihmë ekonomike. Unë do të jem kryemi- nistër i shqiptarëve. Nuk ka shtet të fortë pa ekonomi të fortë. Nuk ka shqiptar që nuk e do Shqipërinë. Shqipëria janë njerëzit, jo fasadat, jo palmat dhe unë do të jem kryeministri i njerëzve, kryeministri juaj. Prioriteti im i padiskutueshëm nga mëngjesi deri në darkë do të jetë ekonomia, vendet e punës, mirëqenia. Jo palmat, jo ekspozitat, jo fasadat”, theksoi kreu i PD-së. Basha kujtoi se programin politik të PD- së e kanë hartuar ek- spertë të CDUU- së gjermane të miratuar nga Kancelarja gjermane, Angela Merkel. Në mbështetje të opozitës dje në hapjen e fushatës zgjedhore në Fier ishte edhe kryetari i Këshillit për Politikat Kombëtare në SHBA, Bob McEwen, i cili gjatë fjalës së tij u shpreh se vota për Lulzim Bashën është një votë pro afrimit të Shqipërisë me perëndimin.