Kodet sekrete të shpërndarësve të heroinës në Tiranë

TIRANE - Dy persona të arrestuar nga operacioni policor antidrogë i koduar "Start 2", në prill të vitit 2016, janë deklaruar fajtorë nga Gjykata e Tiranës për akuzën e "prodhimit dhe shitjes së narkotikëve", në bashkëpunim. Gjykimi ndaj të pandehurve Leonard Baceli dhe Albi Luca, të dyshuar si shpërndarës të dozave të vogla të heroinës në lagje të ndryshme të kryeqytetit, ka përfunduar pak ditë më parë. Gjykata e ka vlerësuar të provuar akuzën e ngritur ndaj tyre dhe ka dhënë për ta nga një dënim me 9 vjet heqje lirie secili. Të pandehurit Baceli dhe Luca u gjykuan të veçuar nga dy të pandehur të tjerë të së njëjtës dosjeje. Sipas Prokurorisë së Tiranës, të pandehurit e kësaj dosjeje janë përfshirë në shpërndarjen e lëndëve narkotike të llojit heroinë, duke ua shitur atë personave përdorues në formën e dozave të ambalazhuara. Aktiviteti kriminal i këtyre personave zhvillohej në orare të ndryshme të ditës. Magazinimi i lëndës narkotike dyshohet se kryhej në një banesë të marrë me qira në afërsi të Unazës së Re. Për shitjen e lëndës narkotike të pandehurit, së bashku me personin me emrin "Labi", përdornin me klientët ( përdoruesit) disa numra celulari. Këto numra i ndërronin çdo 20 ditë, duke bërë njëkohësisht dhe dërgimin me SMS te klientët që blinin lëndë narkotike, numrin e ri të kontaktit, numër i cili dërgohej i shoqëruar me fjalët "Aldo".

Sipas Prokurorisë, shpërndarësit e lëndës narkotike nuk identifikoheshin me emrat e tyre të vërtetë te klientët, por njiheshin me nofka si "Labi", "Lali" apo "Shoku". Vendet ku këta persona shpërndanin lëndën narkotike janë konkretisht Unaza e Re, pallatet e "Astirit", blloku i ambasadave, sh- kolla e mesme "Petro Nini Luarasi", Fusha e Aviacionit. Për dokumentimin e veprimtarisë së jashtëligjshme të të pandehurve, prokuroria ka përgjuar komunikimet e tyre telefonike, si edhe vëzhgime dhe fotografime të veprimtarisë së tyre në terren, nga mënyra si kontaktonin blerësit, deri te shkëmbimi i "mallit" me lekët. Sipas vendimit të gjykatës, nga veprimet e kryera në terren ka rezultuar se një prej klientëve të të pandehurve ka qenë një vajzë, përdoruese e heroinës, e cila ka qenë edhe kliente e besuar e të pandehurve. Në një nga SMS- të e dërguara nga kjo shtetase në mars 2016, e përgjuar nga prokuroria, rezulton se ajo ka blerë një sasi lënde narkotike, si dhe është ankuar mbi cilësinë e saj. Nga një dëshmitarët, përdorues i narkotikëve, ka rrëfyer në gjykim se emrat e këtyre personave nuk i ka ditur, pasi nuk kam pasur marrëdhënie shoqërore, të gjithëve u thoshin shoku, sepse asnjëri nuk e tregonte emrin e vërtetë. Gjatë operacionit "Start 2", nga i cili u prangosën katër persona, policia sekuestroi një sasi prej 11.6 gramësh lëndë narkotike e dyshuar heroinë, e ndarë në 27 porcione; 2.2 gramë lëndë narkotike e dyshuar kokainë, e ndarë në 11 porcione; dhe 30 gramë lëndë narkotike e dyshuar si kanabis sativa, e ndarë në 15 porcione.