Ndryshon lista e PD, renditja e re në Shkodër dhe Lezhë
PD nuk dërgon listën e 140 kandidatëve, kush janë emrat që refuzojnë të hyjnë në garë
Partia Demokratike sërish nuk e respektoi afatin e vendosur nga Komisioni Qendror i Zgjedhjeve për të dorëzuar listat e plota të kandidatëve për deputetë.
Ora 18: 00 e ditës së hënë përkonte me skadimin e afatit një ditor që KQZ- ja i la PD- së që të dorëzonte listat e plota me 140 kandidatë, pasi në institucion ishin depozituar vetëm 94 emra. Pasi u konsultua me anëtarët e tjerë në KQZ dhe komunikoi me persona të komanduar nga PD- ja për të komunikuar me institucionin zgjedhor, kreu i KQZ-së Zguri kërkoi që opozitës t’i jepej afat deri në orën 09: 00 të mëngjesit të sotëm për të dorëzuar listat e plota. “Duke kërkuar një mirëkuptim nga përfaqësuesit e partive politike, por edhe nga kolegët në tavolinë do të propozoja t’i japim edhe një afat deri nesër ( sot) në orën 09: 00 subjektit në fjalë dhe në 09: 30 të thërrasim mbledhjen e komisionit”, deklaroi Zguri. Votimi mori edhe votat e përfaqësuesve të maxhorancës, të cilët deklaruan se me interes është pjesëmarrja e opozitës në procesin zgjedhor.
NDRYSHIMET Dorëzimi jashtë afateve i listës së plotë nga PD- ja është shoqëruar nga një tjetër shqetësim i madh brenda demokratëve. “Sëmundja” e dorëheqjeve që nisi menjëherë pas publikimi të listës nga Basha ka prekur dje të tjerë kandidatë, të cilët kanë refuzuar të jenë pjesë e listave. Dorëheqjet të ambientalistit Sazan Guri në Berat dhe kreut të PD-së lokale në Shkodër, Ramiz Çobaj, nga lista janë shoqëruar me largime të tjera. Dje në mbrëmje nga kandidimi në Shkodër u tërhoq deputeti aktual Helidon Bushati, i cili renditej i katërti në Shkodër. “Jam fort i privilegjuar dhe i nderuar që zoti Basha më bëri pjesë të ekipit të tij, dhe akoma më shumë ndihem nën përgjegjësi për këtë rol që më është ngarkuar. Pikërisht, nisur nga këto detyrime që ndiej, duke analizuar rrethanat politike e specifike të qarkut të Shkodrës, kam vendosur të tërhiqem nga lista, ku unë gëzoj një vend të sigurt fitues, i renditur i katërti, për t’i hapur rrugën një maksimalizimi të rezultatit të Partisë Demokratike në këto zgjedhje”, deklaroi Bushati. Pas largimit ndryshon edhe rendintja e listës së Shkodrës. I katërti zhvendoset Bardh Spahia, i cili ishte i gjashti. I pesti qëndron Nard Ndoka dhe i gjashti hyn rishtas Gjok Uldedaj.
Ndryshimet ka edhe në listën e Lezhës, ku publicisti Preç Zogaj ngjitet në vendin e katërt, ndërsa kandidati Martin Bibaj renditet i pesti.
DORËHEQJET Kreu i PLL- së dhe aleati i Bashës në opozitës, Sulejman Gjana, i renditur i katërti në listën e Dibrës ka dhënë dorëheqjen, duke e cilësuar si fyerje pozicionimin në radhën e kandidatëve. “Renditja e kryetarit të PLL në pozicionin e katërt të listës së PD-së në qarkun e Dibrës, jo vetëm që është e padenjë dhe fyese për mua personalisht dhe PLL, por është edhe një tregues i qartë se PD nuk e dëshiron prezencën e PLL në Parlament”, thuhet në njoftimin e dorëheqjes së Gjanës. Kryesia e Vlorës së Partisë Balli Kombëtar gjithashtu i kërkoi kreut të kësaj force politike, Adriatik Alimadhi, të tërhiqej nga lista e Vlorës. Adriatik Alimadhi, edhe ky aleat i Bashës, është i gjashti në listën e kandidatëve për deputetë në qarkun e Vlorës. Por Berati duket se është qarku më problematik sa i takon listës së PDsë. Ish- prefekti Bujar Hoxha ka deklaruar dje dorëheqjen nga lista e demokratëve për qarkun e Beratit. Edhe për Hoxhën ka qenë i njëjti pretendim, renditja si i gjashti në listë. Por në prag dorëheqje nga lista e Beratit është edhe ish- deputeti Lefter Maliqi. Përmes një ultimatumi, Maliqi i ka lënë afat Bashës deri në mbrëmjen e së mërkurës për të tërhequr listën e Beratit, pasi në të kundërt ai do të japë dorëheqjen. Maliqi i kërkon kreut të PD- së të mbajë premtimin që i ka bërë publikisht në takimet elektorale se ai do të jetë i pari në listën e deputetëve për qarkun e Beratit. Në listën e hartuar nga Basha, Maliqi renditet i treti, pas deputetëve Eduard Halimi dhe Astrit Veliaj.