Thirrja e Topit: Populli të braktisë partitë e vjetra
“Kali i Trojës që e ka filluar misionin në 1990 shkatërroi PD”
Kreu i Frymës së Re Demokratike tha dje se kjo parti do të hyjë në Parlament, madje do të ketë dhe grupin e saj parlamentar.
Në hapjen e fushatës zgjedhore për FRD, Topi i kërkoi elektoratit të braktisë partitë e vjetra, ndërsa akuzoi Sali Berishën se ka shkatërruar të djathtën. “Niveli i politikës shqiptare ka rënë në nivelin e batutave që i shohin vetëm në teatrin e satirës. Kjo vërejtje është si për Kryeministrin, ashtu edhe për kryetarin e opozitës së shpartalluar. Populli duhet të braktisë partitë e vjetra politike, sepse nuk kanë ditur të bëjnë asgjë. FRD nuk është parti e një individi. Edhe ajo që po ndodh në PD është pushteti i pamerituar i një individi, që përcakton fatet e të gjithëve. Kjo është arsyeja që Bamir Topi do jetë në krye të fushatës elektorale, në krye të ekipeve me njerëz të përfaqësuar. FRD do jetë në Parlament, madje do ketë grupin e saj parlamentar”, tha Topi. Ai u kërkoi demokratëve të votojnë FRDnë si parti moderne të së djathtës. “Ne kemi obligimin t’i orientojmë njerëzit që FRD është një parti moderne demokratike dhe se nuk duhet të bëhen fanatikë që të shkojnë drejt një ndërtese që nuk ekziston më, por të drejtohen te FRD”, tha Topi. Ai akuzoi Kryeministrin Rama dhe kreun e opozitës Basha se janë të njëjtët protagonistë, që bënë marrëveshje si në 2008n. “Ata aktorë i keni prapë sot, dikush ekzekutues i ngjarjeve kriminale, dikush rrahës i shpatullave të mëkatarit, ata që ndërtuan 21 prillin e 2008, ata ndërtuan marrëveshjen e dytë, të një marrëveshjeje okulte, e cila nuk demonstroi gjë tjetër, veçse krizën në qelizë të institucioneve shqiptare”, tha Topi. Ai tha se palët po tregojnë dyfytyrësi. “Ne kemi kërkuar reformim substancial të Kodit Zgjedhor, të bindur se drejtësia fillon me ditën e zgjedhjeve. Ka një lloj dyfytyrësie nga politika aktuale, qofshin ata në pushtet, qofshin ata në opozitë. Nga njëra anë kërkojnë drejtësi, nga ana tjetër kërkojnë me çdo kusht të marrin një fitore të pamerituar në tavolinë, madje poshtë tavolinës, duke mos krijuar kushte të barabarta për partitë që marrin pjesë në zgjedhje. Madje, duke ushtruar edhe presion psikologjik në publik, kam parasysh kreun e opozitës, që nga çadra e cilësoi FRD parti mercenare pse do merrte pjesë në zgjedhje. Si mund të jetë një lider demokrat ai që në mënyrë publike etiketon FRD mercenare pse do të marrë pjesë në zgjedhje, ndërkohë që bën akrobacira, pirueta të turpshme për të dalë nga çadra dhe për të përfunduar në këtë gjendje”, tha Topi.