Abonetë, Bashkia pranon: Të njihen dhe ato me pullë
“Abonetë që kanë element shtesë sigurie, janë të vlefshme”
Merr fund çoroditja e përdoruesve të transportit urban për abonenë që duhet të blejnë këtë muaj. Me apo pa pullë, aboneja do të njihet.
Vendimi është i shoqatës së transportit urban, e pasuar dhe nga reagimi i Bashkisë së Tiranës, e cila hedh poshtë njoftimin e ditës së shtunë, që lajmëronte qytetarët të mos blinin abone me pullë. Verdikti zyrtar ka ardhur pas takimit të djeshëm midis përfaqësuesve të shoqatës dhe Bashkisë, ku është rënë dakord që bileta e pajtimit mujor që ka elementet e duhura të sigurisë, me apo pa pullë, të jetë e vlefshme.
SQARIMI Nëpërmjet një njoftimi të dytë në harkun e tri ditëve, Bashkia njofton qytetarët se do të njihen të gjitha abonetë për autobusët e transportit urban. “Bashkia e Tiranës në vijim edhe të njoftimit të mëparshëm lidhur me elementet e sigurisë të kartelave të pajtimit të abonentëve, njofton të gjithë qytetarët se formati i aprovuar përmban kartonin shoqërues, si edhe abonenë e Drejtorisë së Përgjithshme të Tatimeve. Njoftojmë gjithashtu se edhe abonetë, të cilat kanë pullën si element shtesë sigurie, janë abone të vlefshme dhe që njihen në të gjitha linjat e transportit publik qytetas, siç janë edhe të përshkruara në pjesën e prapme të kartonit shoqërues”, sqaroi Enton Punavija, drejtor i Transportit dhe Trafikut Rrugor në Bashkinë e Tiranës. Në njoftimin për mediat, Bashkia e Tiranës u bën thirrje qytetarëve të pajisen normalisht me kartelën e pajtimit mujor, ndërsa thekson se do të vijojë monitorimin e situatës. Aboneja e miratuar nga Ministria e Financave ka një format të tillë: kartoni shoqërues i ndryshueshëm çdo muaj ka në krye të saj logon dhe mbishkrimin “Bashkia Tiranë” me germa kapitale. Ndërsa në anën e djathtë, vertikalisht, shënohet me shkrim muaji dhe viti përkatës me numra natyrore. Në mes të kartonit shoqërues bashkëlidhet aboneja e prodhuar nga Drejtoria e Përgjithshme e Tatimeve. Në pjesën lidhëse mes saj dhe kartonit shoqërues mund të jetë ose jo pulla e sigurisë mbi të cilën shënohet muaji qershor. Ndërsa në pjesën e prapme të kartonit shoqërues janë të listuara 13 linjat qytetase të Bashkisë së Tiranës, ku aboneja është e vlefshme.