Ish- të përndjekurit, emrat që marrin dëmshpërblimin

Financat: Duhet të aktivizojnë numrin e llogarisë bankare

Ministria e Financës ka publikuar dje emrat e 30 të dënuarve nga regjimi komunist që kanë gati dëmshpërblimin, por për shkak të mangësive në dokumentacion nuk është bërë kalimi i parave në bankë. Janë 10 ish- të përndjekur, që në vend të certifikatës personale kanë dorëzuar pranë sektorit të pagave dhe dëmshpërblimeve certifikatë familjare. Ministria e Financës ka sqaruar se ndarja e këstit do të nisë atëherë kur të jetë bërë plotësimi i dosjes. Ndërsa krahas tyre janë edhe 20 të dënuar të tjerë, që kanë probleme me numrin e llogarisë. Pagesat për ta nuk janë kryer, pasi numri i llogarisë që kanë depozituar nuk është aktiv. Nga fondi vjetor për kategorinë parësore kanë mbetur edhe rreth 700 milionë lekë ose rreth 7 milionë dollarë. Me këto para pritet që rreth 1600 të dënuar të përfitojnë këstin e tetë të dëmshpërblimit. Aktualisht Ministria e Financës ka nisur nga puna për kryerjen e këtyre pagesave. Bazuar në skemën e re që ka nisur të aplikohet pas miratimit të ndryshimeve ligjore, të parët që përfitojnë janë të dënuarat gra dhe ata që janë në moshë mbi 75 vjeç. Paralelisht kanë nisur të ndahen edhe pagesat e para për trashëgimtarët. Për këta të fundit janë 6 milionë dollarë nga fondi vjetor. Ndërkohë në proces shqyrtimi janë rreth 450 dosje, që pritet të marrin këstin e dytë. Këto familje kanë afat deri në fund të muajit korrik për të depozituar dokumentacionin e nevojshëm. Nëse kjo nuk ndodh, me fondin e mbetur do të nisë procesimin kësti i tretë për trashëgimtarët.