Zv. ministrja: Do të identifikohen asetet e krijuara nga kanabisi

TIRANE - Identifikimi dhe sekuestrimi i aseteve të krijuara nga veprimtaritë kriminale, sipas zv. ministres së Brendshme, Rovena Voda, është një kriter i rëndësishëm për të matur shkallën e suksesit në përballjen me fenomenin e kanabisit. Voda, njëherësh drejtuese e Njësisë Task Forcë Antikanabis, deklaroi dje se, në ndryshim nga qasjet e mëparshme strategjike dhe nga praktika e ndjekur nga organet ligjzbatuese, orientohen përpjekjet e institucioneve në fazat e hershme të ciklit të kultivimit të kanabisit. Dje u zhvillua mbledhja e Task Forcës qendrore në ambientet e Ministrisë së Brendshme, ku u theksua se, duke iu referuar shifrave, për vitin 2017, janë rreth 4 herë më pak bimë narkotike të kultivuara në krahasim me të njëjtën periudhë të një viti më parë. “Risia e këtij viti, ndër të tjera, është krijimi dhe implementimi në rrjetin informatik të Policisë së Shtetit të sistemit elektronik ‘ Ueb- GIS’, nëpërmjet të cilit bëhet e mundur hedhja, administrimi dhe evidentimi i të dhënave për rastet e kultivimit të bimëve narkotike në shkallë vendi. Tashmë është e qartë për të gjithë se ky prioritet i qeverisë Rama nuk mund të realizohet pa angazhimin dhe mirëkoordinimin e të gjithë aktorëve shtetërorë, përfaqësues të të cilëve jeni ju sot, të ulur në këtë tryezë. Ne besojmë fort se nuk do të mungojë nga ana juaj ky angazhim institucional, duke garantuar plotësisht zbatimin e planit të masave të secilit institucion mbi bazën e indikatorëve dhe brenda afateve të përcaktuara”, tha Voda. Nga janari 2017 e deri sot janë asgjësuar rreth 23.700 bimë narkotike, pjesë e 70 procedimeve. Rreth 10 mijë rrënjë kanabis janë asgjësuar që në fazën e mbjelljes në kubikë. Në krahasim me të njëjtën periudhë të vitit të kaluar janë proceduar penalisht 158 autorë më shumë.