Gjykata i ul 45 ditë burg David Braunit
TIRANE - Gjykata e Tiranës vendosi t'i ulë 45 ditë nga dënimi i mbetur David Braunit, shtetasit britanik të dënuar me 20 vjet burg nga drejtësia shqiptare për pedofili. Vendimi u shpall paraditen e djeshme, në pranim të kërkesës së bërë nga përfaqësuesja ligjore e të dënuarit Braun. Avokatja e bazoi kërkesën në të drejtën ligjore të dënuarve me një vendim të formës së prerë, kur përmbushen disa kritere të tjera të sjelljes në ambientet e burgut. Vetë kërkuesi Braun nuk ishte prezent në sallën e gjyqit. "David Braun ka sjellje shumë të mirë në ambientet e Burgut 302, ku po vuan dënimin e marrë nga gjykata. Ai ka zbatua rregulloren e brendshme të burgut, ka marrëdhënie shumë të mira me të dënuarit e tjerë dhe ka marrë pjesë në të gjitha aktivitetet e përbashkëta të të dënuarve. Po ashtu, Braun është përfshirë në organikën e të punësuarve në burg", tha avokatja e tij. Pretendimi i avokates u mbështet edhe nga përfaqësuesi ligjor i burgut "Mine Peza". Juristi i burgut i kërkoi gjykatës të pranohej kërkesa e Braunit për ulje dënimit, duke argumentuar ndër të tjera në raportin e institucionit se britaniku i dënuar shfaq përgjegjshmëri dhe nuk paraqet rrezikshmëri shoqërore. Sipas përfaqësuesit të burgut, David Braun ka edhe gati 4 vjet e 8 muaj dënim për të kryer. Pasi u njoh me pretendimet e palëve gjyqtarja Vjollca Spahiu vendosi pranimin e kërkesës, uljen me 45 ditë të dënimit të mbetur të Braunit. Dy muaj më parë Gjykata e Tiranës rrëzoi kërkesën e David Braunit për rihapje të gjykimit ndaj tij. Britaniku pretendoi se tre dëshmitarë të pyetur gjatë gjykimit të tij, minorenë, kanë dhënë dëshmi jo të vërteta, të ndikuara nga psikologu dhe policia.