Kreditë e buta muajin tjetër, interesi 3% për dy vite
“Bashkia nuk subvencionon interesin për dy vitet e para”
Kreditë e buta nuk do të jepen këtë muaj. Këshilli Bashkiak do të mblidhet sot me 13 pika në rendin e ditës, kryesisht të karakterit social. I vetmi lajm për kreditë e buta është zgjedhja e bankës fituese që do të lëvrojë kreditë, e cila ka rënë dakord me Bashkinë që për dy vitet e para interesi të jetë 3%, vlerë e njëjtë me interesin që duhet të paguajnë përfituesit. “Në zbatim të vendimit të Këshillit Bashkiak nr. 20, datë 20.02.2017, për trajtimin me kredi afatgjatë me kushte lehtësuese të familjeve të pastreha, Bashkia e Tiranës ka përfunduar procesin e konkurrimit për përzgjedhjen e bankës nëpërmjet së cilës do të zbatohet projekti. Referuar termave financiarë të ofertës fituese, Bashkia e Tiranës nuk do të kontribuojë në pagesën e interesit për dy vitet e para të projektit”, thuhet në relacionin shpjegues të projektvendimit. Për rrjedhojë, fondi i programuar për mbulimin e interesave të kredisë për dy vite nga ana e bashkisë nuk do të shkojë për shtimin e numrit të përfituesve, por do të përdoret për shpenzime operative, më konkretisht do të rishpërndahet për shërbimin e dekorit dhe blerjen e një furgoni për projektin “Tirana e shëndetshme”. Ndonëse kanë kaluar muaj nga miratimi i buxhetit, ende bëhen ndryshime të cilat lidhen me projekte që janë miratuar së fundmi nga Fondi i Zhvillimeve Rajonale. Bëhet fjalë për rikonstruksionin e shkollës “Dora d’Istria”, ndërtimin e një korsie biçikletash në Rrugën e Kavajës dhe të Dibrës, ndërtimin e sallës së koncerteve te liceu “Jordan Misja”, si dhe pro- gramin e nxitjes së punësimit me vlerë 10 mijë lekë për 24 muaj. Veç kësaj, në të njëjtin projektvendim parashikohet shtimi i 20 punonjësve në varësi të agjencisë së parqeve dhe rekreacionit, si dhe zgjatja e kontratës së të punësuarve sezonalë. Një tjetër projektvendim që do të shqyrtohet sot në këshill, ka të bëjë me zgjerimin e veprimtarisë së “Eco Tirana”, e cila, përveç mbledhjes dhe grumbullimit të diferencuar të mbetjeve, mund të ndërtojë e menaxhojë, për llogari të palëve të treta, impiante për riciklimin dhe asgjësimin e mbetjeve.