Sekuestrohet prona me vlerë 2 milionë euro në Zvërnec
Dosjet gjyqësore u falsifikuan dhe u futën në arkivin e Gjykatës
Sekuestrohet një sipërfaqe toke në zonën e Zvërnecit, e cila në vlerën e tregut kushton më shumë se 2 milionë euro.
Me kërkesë të Prokurorisë së Vlorës, gjykata e këtij rrethi ka vendosur nën sekuestro dy parcela tokë me sipërfaqe totale 52.000 m2 në zonën e Zvërnecit, të dyshuara se janë përfituar në bazë të dokumentacionit të falsifikuar. Sipas informacionit të dhënë, Prokuroria e ka nisur kryesisht hetimin për këtë rast. “Në bazë të këtij hetimi ka rezultuar se dosja gjyqësore që i përket vendimit civil nr. 3805, datë 23/ 12/ 1996, të Gjykatës së Rrethit Gjyqësor Vlorë, si dhe dosja gjyqësore që i përket vendimit civil nr. 147, datë 24/ 12/ 1997 të Gjykatës së Rrethit Gjyqësor Vlorë, janë falsifikuar dhe futur në kundërshtim me ligjin në arkivin e Gjykatës së Rrethit Gjyqësor Vlorë. Ky fakt është provuar nga akti i ekspertimit tekniko- grafik. Rezulton e provuar se përmes vendimit civil nr. 3805, datë 23/ 12/ 1996, të Gjykatës së Rrethit Gjyqësor Vlorë, i cili është tërësisht i falsifikuar, është pasqyruar fakti sikur i janë kthyer në natyrë shtetases Shqiponjë Eminaj ( Kamberaj) dy parcela të lira, njëra 30.000 m2 dhe parcela e dytë me sipërfaqe 22.000 m2, pronë e cila ndodhet në bregdet në zonën e Zvërnecit, Vlorë. Rezulton e provuar se edhe vendimi civil nr. 147, datë 24/ 12/ 1997, i Gjykatës së Rrethit Gjyqësor Vlorë është tërësisht i falsifikuar, ku përmes së cilit është pasqyruar fakti i rremë, sipas të cilit është lëshuar urdhri i ekzekutimit për vendimin nr. 3805, datë 23/ 12/ 1996, të Gjykatës së Rrethit Gjyqësor Vlorë, thuhej në njoftimin e dhënë dje nga prokuroria e përgjithshme. Sipas këtij njoftimi, nga hetimi është provuar se pasuria e mësipërme me sipërfaqe 52.000 m2 është regjistruar më datë 21 mars 2013 pranë Zyrës Vendore të Regjistrimit të
Pas regjistrimit të kësaj pasurie, e cila kap vlerën e mbi 2 milionë eurove, janë kryer veprime juridike mbi këtë pasuri, e konkretisht ndarje, shitje dhe dhurime, me qëllim fshehjen e paligjshme të origjinës së kësaj pasurie
Pasurive të Paluajtshme Vlorë. Regjistrimi i kësaj pasurie është kryer mbi bazën e dokumenteve të falsifikuara, e konkretisht dy dosjeve të mësipërme gjyqësore. Pas regjistrimit të kësaj pasurie, e cila kap vlerën e mbi 2 milionë eurove janë kryer veprime juridike mbi këtë pasuri, e konkretisht ndarje, shitje dhe dhurime, me qëllim fshehjen e paligjshme të origjinës së kësaj pasurie. “Mbi bazën e kërkesës së prokurorit, Gjykata e Rrethit Gjyqësor Vlorë ka vendosur caktimin e masës së sigurimit pasuror ‘ sekuestro preventive’ për pasuritë e paluajtshme me sipërfaqe 52.000 m2", bëri të ditur prokuroria. Ndërkaq, nuk bëhet e ditur se cilët janë pronarët e tjerë që kanë përvetësuar sipërfaqe në këtë zonë në sajë të veprimeve juridike nëpërmjet ndarjes, shitjes apo dhurimit.