Shullazi, prokuroria kërkon dëshmi nga Tahiri e Nikolla
Nis gjyqi për grupin me pesë të akuzuar për “gjobëvënie”
Prokuroria për Krimet e Rënda kërkoi dje pyetjen si dëshmitarë të ish- ministrit të Brendshëm, Saimir Tahiri, ish- ministres së Arsimit, Lindita Nikolla, dhe drejtorit të Policisë së Shtetit, Haki Çako.
Ata janë pjesë e listës me 38 dëshmitarë në total të prokurorisë në procesin gjyqësor ndaj Emiliano Shullazit dhe katër të bashkëpandehurve të tij. Kërkesa për prova e prokurorisë u artikulua në seancën e radhës të këtij procesi, ku u deklarua i hapur shqyrtimi gjyqësor. Më herët gjykata rrëzoi pretendimet e avokatëve për deklarim të pavlefshëm të kërkesës për gjykim. Përfaqësuesit e prokurorisë, Elisabeta Imeraj dhe Ened Nakuci, i thanë trupit gjykues se të pandehurit Emiliano Shullazi, Gilmando Dani, Endrit Qyqja, Endrit Zela dhe Blerim Shullazi dyshohet të jenë pjesë e një grupi kriminal të përfshirë në “gjobitjen” e 3 biznesmenëve: Ylvi Beqja, Jani Zaka dhe Adriatik Kërçuku, si dhe kanosjen për shkak të detyrës të profesorëve të Universitetit të Tiranës, Mynyr Koni dhe Dhori Kule. Duke iu referuar kërkesës për gjykim, prokurorët paraqitën kronologjinë e episodeve kriminale për të cilat akuzohen të pandehurit e dosjes. Këta të fundit, të pranishëm në sallën e gjyqit, nuk shfaqën asnjë pretendim gjatë seancës. Ata u mjaftuan me konfirmimin e gjeneraliteteve të tyre dhe në çdo rast të mbështetjen e pretendimet të mbrojtësve, duke i thënë gjykatës “jam dakord me avokatin”.
DESHMITARET Përveç dy ish- ministrave dhe zyrtarit të lartë të Policisë së Shtetit, prokuroria kërkoi edhe një sërë dëshmitarësh të tjerë me të cilët pretendon të provojë nëntë akuzat e ngritura kundër të pandehurve. Prokurorët kërkuan thirrjen si dëshmitar të rektorit të Universitetit të Tiranës, Mynyr Koni, dhe ish- rektorit, Dhori Kule, si dhe ish- drejtorit të Policisë së Tiranës, Ervin Hodaj. Po ashtu kërkoi pyetjen e biznesmenit Ylvi Beqja, i cili dyshohet se i ka dhënë nën presion 541 mijë euro grupit të Shullazit, dy biznesmenët e tjerë të “gjobitur”, si edhe avokati Neshat Fana. Njëkohësisht, prokuroria kërkoi edhe dëshminë e të pandehurve, nëse ata japin pëlqim. Në morinë e provave shkresore, përfaqësuesit e Akuzës kërkuan administrimin e pro- cesverbalit të seancës së dëshmisë së biznesmenit Beqja, për llogari të “sigurimit të provës”, ndërsa çështja ishte në hetim. Avokatët e të pandehurve shfaqën kundërshtime për provat e kërkuara nga akuza me pretendimin se ato ishin kaotike dhe se prokurorët nuk kishin saktësuar se çfarë kërkonin të provonin me secilën provë. Gjykata pritet të shprehet më kërkesën për prova të prokurorisë në seancën e radhës, pasi të dëgjojë edhe pretendimet dhe kundërshtitë e mbrojtjes.