Grabitet me dhunë makina, autorët morën çantën me 1 milion lekë
TIRANE – Një sasi prej rreth 1 milionë lekësh të rinj të një kompanie pijesh janë grabitur mesditën e së hënës nga tre persona ende të paidentifikuar. Ngjarja ka ndodhur në rrugën “Memo Meto”, që ndodhet mes bllokut të pallateve prapa zonës së njohur si “Restorant Durrësi”, në Tiranë. Në momentin kur ndodhi grabitja, paratë po transportoheshin me një makinë tip “Volkswagen” në zyrat e kompanisë, që ndodhet diku afër vendit të ngjarjes. Në makinën që drejtohej nga shoferi 31- vjeçar me iniciale T. M., ndodhej edhe ekonomistja e shoqërisë, shtetasja me iniciale A. P., 33 vjeçe. Burime nga Policia e Tiranës thanë se nisur nga deklarimet e dy të dëmtuarve, autorë të grabitjes kanë qenë 3 persona, të pamaskuar, por që mbanin kapelë në kokë. Ata kanë vepruar duke thyer xhamin e makinës me përforcues grushti dhe më pas kanë mar- rë çantën ku ndodheshin paratë. Sipas burimeve zyrtare të Policisë së Tiranës, të hënën, rreth orës 12: 30, në rrugën “Memo Meto”, te “Restorant Durrësi”, tre persona të paidentifikuar i kanë dalë para automjetit tip “Volkswagen”, me drejtues shtetasin T. M., 31 vjeç. Në makinë ndodhej edhe shtetasja A. P., 33 vjeçe, ekonomiste ne një firmë private. Këta persona i kanë marrë me dhunë shumën monetare prej 1 milion lekësh të rinj ekonomistes së kompanisë dhe më pas janë larguar. Në një moment një person që dukej si i dehur, pasi ecte në mënyrë të shpërqendruar, i ka dalë para makinës ku ndodheshin paratë. Në këto rrethana shoferi ka ndaluar për t’i ardhur në ndihmë personit që bënte si i dehur, por në fakt ishte një prej grabitësve. Ky person është rrëzuar dhe për këtë arsye ka zbritur nga makina edhe ekonomistja e kompanisë. Por në këtë kohë kanë hyrë në “lojë” dy bashkëpunëtorët e “të dehurit”, të cilët kanë thyer xhamin e makinës dhe kanë marrë çantën me para. Dy punonjësit e kompanisë kanë kuptuar që ishte një grabitje vetëm pasi kanë parë që u thyen xhamat e makinës, por autorët i kanë kërcënuar duke mos u lënë kohë të reagojnë. Pasi kanë marrë çantën me para, grabitësit janë larguar me shpejtësi nga vendi i ngjarjes. Po kështu, një 56- vjeçar është grabitur mbrëmjen e së hënës nga dy persona të maskuar që e kanë kërcënuar me pistoletë.