Maqedoni, Talat Xhaferi mban seancë në gjuhën shqipe
Seanca e parë që pas dhunës, protestojnë deputetët e Gruesvkit
Kryetari i ri i Kuvendit të Maqedonisë, Talat Xhaferi, ka udhëhequr seancën e parë parlamentare që pas ngjarjeve të dhunshme të 27 prillit, duke folur në gjuhën shqipe.
Xhaferi është shqiptari i parë që ulet në pozitën e kryeparlamentarit në Maqedoni dhe prezantimi i tij edhe në gjuhën shqipe ka shkaktuar revoltë te deputetët e VMRO- DPMNE. Xhaferi ka debatuar të martën me deputetin e VMRO-DPMNE- së Vllatko Gjorçev, i cili pa marrë të drejtën nga kryeparlamentari tentoi të flasë në foltore. “Vllatko, shko ulu në vend! Vllatko, të lutem ulu, kur të marrësh të drejtën e fjalës, atëherë do të flasësh. S’ke të drejtë të dalësh në foltore pa ta dhënë unë fjalën”, i thoshte Xhaferi deputetit Gjorçev, i cili refuzonte t’i bindet kërkesës së tij. Më pas, Xhaferi shpalli pauzë si mënyra e vetme për t’i mbyllur gojën deputetit të Nikolla Gruevskit. Xhaferi është konfrontuar verbalisht edhe me deputetin tjetër të VMRO, Antonio Milloshoski, rreth gjuhës shqipe. “Nëse më drejtoheni si deputet, kam të drejtë të përdor gjuhën time, që ma garanton edhe rregullorja”, deklaroi kryeparlamentari Xhaferi “Po e thyeni ligjin për përdorimin e gjuhëve. Aty shkruan se gjuhë zyrtare në Kuvend është maqedonishtja. Apelojmë që ky ligj të respektohet, edhe nga depu- teti Talat Xhaferi, por edhe të tjerët! Xhaferi nuk është kryeparlamentar, sepse është zgjedhur në mënyrë jo legjitime, prandaj ne do ta konsiderojmë si deputet”, ka thënë Milloshoski. Por Xhaferi e ka vijuar seancën. Sot në mesditë mbahet seanca ku do të votohet qeveria e re dhe programi i saj, pas debateve të djeshme në Kuvend, ku u diskutua programi i qeverisë Zaev dhe kryeministri mbajti fjalën e tij të parë. Zoran Zaev në foltoren e Kuvendit tha se ai do të udhëheqë një qeveri reformatore në Maqedoni. “Do të fokusohemi në ekonominë, në institucione të forta dhe drejtësi për të gjithë, dhe do të fokusohemi për NATO dhe perspektiva europiane. Para jush kërkoj besimin për qeverinë e re dhe për programin e ri”, tha Zoran Zaev, duke shtuar se do të punojë në të mirën e qytetarëve të vendit. Ai tha se Maqedonia do të jetë shtet i të gjithëve.