Dokumentet sekrete për Sadik Premten, Enver Hoxha: Të ndiqet e të sulmohet
Mehmet Shehu: Fraksioni tradhtar i Xhepit na pati minuar organizatën e na pati katandisur në ditë të hallit
Në vitin 1943, Enver Hoxha do të urdhëronte që Sadik Premten ta ndiqnin e ta luftonin, jo vetëm me fjalë, ndërsa pesë vjet më vonë, në Plenumin e Tetë të PKSH ai u konsiderua si "agjent i imperializmit amerikan" në Shqipëri. Lufta ishte hapur prej kohësh dhe ajo vazhdoi edhe gjatë kohës kur Sadik Premtja jetonte në mërgim, në Francë. Sadik Premtja ishte një nga komunistët e orëve të para, themelues u Grupit Komunist të të Rinjve, që bashkë me grupin e Korçës e atë të Shkodrës, pavarësisht përplasjeve, krijuan Partinë Komuniste. Sadik Premtja ishte një element i spikatur, ishte orator dhe bindës, ndaj edhe pseudonimi i tij ishte "Xhepi". Sipas bashkëkohësve, ai ishte i aftë t'i bënte njerëzit për vete, pra "t'i fuste në xhep". E tregojnë idealist, ndaj edhe shumë shpejt do të kthehej në opozitar brenda partisë. Krerët më të lartë të partisë ishin të shqetësuar për të. Kjo duket në letrat që i dërgojnë njëri- tjetrit gjatë viteve të luftës, ku emri i "Xhepit" do të ishte kudo i pranishëm. Vetë Enver Hoxha ishte i shqetësuar për të, duke i shpallur luftë të hapur. Ndërsa në Plenumin e Tetë të PKSH, në vitin 1948, u dënua Grupi i të Rinjve. Libri voluminoz "Eleminimi i Grupit komunist të të rinjve", i autorit Enver Lepenica, botim i Institutit të Studimit të Krimeve dhe Pasojave të Komunizmit, sjell dokumente, dëshmi e studime që vërtetojnë jo vetëm përndjekjen që i është bërë Grupit të të Rinjve, por në veçanti Sadik Premtes. Më poshtë po shkëpusim disa letra që krerët komunistë i dërgonin njëri- tjetrit për ndjekjen e "Xhepit", por edhe elementëve të tjerë komunistë apo të Ballit e Legalitetit. Në një letër që Ymer Dishnica i dërgonte Enver Hoxhës, fliste për bindjen e Hysni Lepenicës, se Mehmet Shehu ishte përpjekur ta eliminonte, ndërsa Enver Hoxha, në një tjetër letër do të shprehej kundër propozimit për vrasjen e Ali Këlcyrës.