Fushata, reagon DAP për nëpunësit civilë
Ministrat teknikë të propozuar nga PD vijuan edhe dje pezullimet nga puna për ata nëpunës civilë që kanë marrë pjesë në fushatën zgjedhore. Ministri i Drejtësisë, Gazment Bardhi, shkarkoi dje nga detyra dhe ka kallëzuar në Prokurori regjistruesin e Zyrës së Regjistrimit të Pasurive të Paluajtshme në Shkodër, Mondi Ndou, për përfshirje në fushatë zgjedhore. Departamenti i Administratës Publike ndërhyri dje për të sqaruar ligjin e nëpunësit civil në lidhje me pjesëmarrjen e punonjësve shtetërorë në fushatën elektorale. Drejtoresha Albana Koçiu tha se kushdo mund të marrë pjesë në fushatë jashtë orarit zyrtar të punës dhe perimetrit të institucionit. “Të drejtat politike për punonjësit e administratës publike fillojnë pas orarit zyrtar dhe jashtë perimetrit të institucionit ku punojnë. Kushdo ka të drejtë të angazhohet politikisht me cilëndo parti. Mësuesit janë të lirë, drejtorët janë të lirë, por jashtë institucionit dhe jashtë orarit zyrtar”, deklaroi Koçiu. “Nuk lejohet, sipas saj, përdorimi i institucionit për fushatë”. Nga ana tjetër, qeveria po përgatit një vendim ku, ndër të tjera, parashikohet ngritja e një strukture të posaçme, që do të monitorojë pjesëmarrjen e administratës në fushatë. Ndërsa deputeti socialist Pandeli Majko ironizoi dje pezullimet e punonjësve të administratës nga ministrat teknikë. “E di që sot në miting ka shumë njerëz që për shumë arsye na kanë vënë dhe syze. Një pjesë e tyre i kanë vënë nga halli se punojnë në administratën civile. Na janë bërë ministrat teknikë si ‘ big brother’ dhe ‘ big sister’. Kanë filluar shikojnë edhe Facebook. Imagjinoni vetëm një muaj në zyrë do të jenë dhe shikoni çfarë bëjnë, po katër vjet?”, u shpreh Majko.