“Refuzimi i qeverisë me PS e bën PD fituese”
Patozi insiston kundër bashkëqeverisjes: Karrem i Ramës
Deputeti i Partisë Demokratike, Astrit Patozi, ka analizuar fushatën politike dhe idenë e koalicionit të madh mes PS dhe PD pas zgjedhjeve të 25 qershorit. Në një postim në faqen e Facebook, deputeti i lenë jashtë listave të PD- së ka thënë se Edi Rama është përfituesi i vetëm i idesë së koalicionit të madh paszgjedhor. Shkrimin e tij Patozi e ka quajtur “Kush po e ha karremin e helmuar të Edi Ramës”. “Po pse them se Edi Rama është krijuesi dhe përfituesi i vetëm i kësaj loje të pistë me zgjedhjet, e cila pretendon të zëvendësojë atë humbje që mund t’u shkaktojë llogarive të tij paraelektorale pamundësia e pjesshme për t’i vjedhur apo blerë votat, pas arritjes se marrëveshjes? Sepse duke krijuar idenë e rreme të një detanteje të gjatë politike në Shqipëri, Edi Rama po përpiqet të vrasë me një gur dy zogj, duke dëmtuar njëkohësisht planet dhe fuqinë elektorale të Partisë Demokratike dhe të LSI- së”, shkruan Patozi. Më këtë teori sipas demokratit më shumë po dëmtohet LSI- ja, e cila në dy zgjedhjet e fundit ka luajtur rolin e “king maker- it”. “Por një bashkëqeverisje PDPS nga ana tjetër hedh në erë shpresat e LSI- së për të qenë sërish ‘ king maker’ në qeverinë e ardhshme, që ka qenë edhe gjeneratori i vetëm i fushatave të saj në të paktën dy zgjedhjet e fundit. Duke u kapur në befasi, partia e Ilir Metës me kryetar Petrit Vasilin, duket qartë se e ka të vështirë të përshtatet për të gjetur një strategji tjetër fituese”, shkruan ai. Patozi ka sugjeruar që PD të ndjekë strategjinë që po aplikon tashmë Basha në zgjedhje, atë të mosbërjes së pazareve. “Në ndryshim me Ilir Metën, PD ka zgjedhur të mbrohet nga ky diversion, duke u distancuar publikisht nga mundësia e një koalicioni të madh, ideja e të cilit do të zbehte energjitë e demokratëve në fushatë. Lulzim Basha, që udhëheq opozitën e bashkuar nën siglën e Partisë Demokratike, ka deklaruar disa herë me forcë se nuk do të ketë pazar me Edi Ramën dhe LSI- në, duke fashitur çdo zë tjetër, qendror ose periferik të opozitës, që i fryn kësaj legjende me pasoja shkatërruese. Kam bindjen se kjo është mënyra më e mirë dhe e vetmja që Partia Demokratike të ruajë jo vetëm ritmin e fushatës së vet, por edhe objektivat e saj për të fituar më 25 qershor”, shkruan demokrati në analizën e tij.