Raporti, 21% e adoleshenteve kanë sjellë në jetë fëmijë
Problem martesat në moshë të hershme, kequshqyerja e arsimimi
Fëmijë të dhunuar, të kequshqyer dhe larg shkollës. Adoleshentë të martuar apo në bashkëjetesë dhe adoleshentë që sot mbajnë mbi supe një tjetër status, atë të prindërit.
Është kjo një pjesë e realitetit që na imponohet çdo ditë. Por çfarë e bën më shqetësuese situatën dhe më të mprehtë fenomenin janë shifrat që na prezantohen.
RAPORTI Sipas raportit global “Fëmijëri të grabitura”, publikuar dje nga organizata “Save dhe children”, 8 për qind e fëmijëve sot janë jashtë sistemit arsimor, qoftë ky i ulët apo i mesëm, ndërkohë 5% e tyre, të kushtëzuar prej kushteve ekonomike, detyrohen që të punojnë për të nxjerrë bukën e gojës. Kequshqyerja dhe vdekshmëria foshnjore mbeten po ashtu problematike, në shifra përkatësisht 23% dhe 14%. “Në Indeksin ‘ Fundi i Fëmijërisë’ Shqipëria renditet në vendin 71 nga 172 vende të vlerësuara në të gjithë botën. Pozicionimi në vendin e 71- të tregon se në Shqipëri ka ende disa fëmijë që e kanë humbur fëmijërinë e tyre. Treguesi me vlerësimin më të ulët dhe ku situata paraqitet me problematike është ai në lidhje me kequshqyerjen e fëmijëve nën moshën 5 vjeç. Krahasuar me vendet e rajonit tonë, Shqipëria ka renditjen më të ulët. Renditja e vendeve të tjera është si vijon: Bosnja dhe Hercegovina në vendin e 35- të, Serbia në vendin e 41- të, Mali i Zi në vendin e 44- t dhe Maqedonia në vendin e 56- të”, theksohet në raport, ku vihet në dukje po ashtu se mbi 700 milionë fëmijë në botë iu është mohuar fëmijëria. Nigeria renditet e fundit. Ndërsa vendet ku fëmijëria është më pak e kërcënuar janë Norvegjia, Sllovenia dhe Suedia.
ADOLESHENTËT Në lidhje me adoleshentët, raporti vëren se 6.5% prej tyre sot janë të martuar ose në bashkëjetesë, ndërsa trefish më e lartë është shifra e atyre që janë bërë prindër. Nga të dhënat, 21% e adoleshenteve të moshës nga 15 deri në 19 vjeç kanë sjellë në jetë një fëmijë. Të dhënat i takojnë vitit 2015. Ndërkohë një tjetër tregues që vjen për herë të parë është edhe ai për aktin e vetëflijimit të ndërmarrë nga fëmijët. Sipas raportit, 1.3% prej tyre të grupmoshës nga 0 deri në 19 vjeç kanë kryer vetëvrasje.