Dixhitalizohet fondi filmik i Arkivit, mes tyre xhirime të Enver Hoxhës
Vitet, kushtet, teknologjia e vjetruar rrezikojnë materialet filmike në Arkivat e shtetit. Përpara se të jetë shumë vonë, është menduar një projekt shpëtimi. Sot, në ambientet e Drejtorisë së Përgjithshme të Arkivave nënshkruhet marrëveshja mes drejtorit të DPA, Ardit Bido, dhe drejtoreshës së AQSHF- së, Elvira Diamanti, për dixhitalizimin e dokumenteve filmike të Drejtorisë së Përgjithshme të Arkivave në Arkivin Qendror Shtetëror të Filmit. Në arkiva ruhen materiale filmike me një rëndësi të veçantë historike. Mësohet se mes tyre janë edhe filmime me karakter personal të diktatorit Enver Hoxha. Një pjesë e tyre paraqesin diktatorin gjatë kohës së lirë, në praninë e familjarëve të tij, por edhe pamje nga ditët e fundit të jetës së Enver Hoxhës. Edhe këto materiale paraqiten në një gjendje jo fort të mirë dhe do t'i nënshtrohen dixhitalizimit, ashtu si edhe filmimet e tjera, po aq të rëndësishme. Nga ana e AQSHF- së mësojmë se ky projekt parashikon pastrimin dhe restaurimin fizik të fondit filmik 16 mm dhe 35 mm në pronësi të Drejtorisë së Përgjithshme të Arkivave. Ky operacion do të ndërmerret me qëllim "evitimin e kontaminimit nga myku dhe agjentë të tjerë dëmtues". Po ashtu, objekt i këtij projekti është dixhitalizimi i tij në format dixhital mpg4. "Dokumentacioni filmik, objekt i kësaj marrëveshjeje, është në pronësi të DPA dhe ka vlera të mëdha dokumentare dhe historike. Ai është i ndarë në shirita filmi 16 dhe 35 mm, që përmbajnë imazhin dhe shirita magnetikë që përmbajnë zërin që shoqëron imazhin", njofton AQSHF. Drejtoria e Përgjithshme e Arkivave e konsideron një "marrëveshje shumë e rëndësishme, sepse nëse nuk do të dixhitalizohen brenda afatit, ato filmime do të shkatërrohen për shkak të vjetërsisë tyre".