Pallatet, Veliaj: Pagesa për administratorët te fatura e ujit
“Kontributin për apartament e caktoni ju, vjeljen e bëjmë ne”
Shumë shpejt, asnjë banor pallati nuk do të mund t’i fshihet detyrimit për administrimin. Bashkia e Tiranës ka vendosur të përdorë Ndërmarrjen e Ujësjellës- Kanalizimeve si agjent tatimor edhe për tarifën e detyrueshme të administrimit të pallateve. Përveç tri taksave, të pronës, infrastrukturës arsimore dhe pastrimit, shumë shpejt edhe detyrimi për kujdesin e hapësirës së përbashkët do të vijë bashkë me faturën e ujit. Këtë risi e bëri me dije kryetari i Bashkisë, Erion Veliaj, në takimin me administratorët e rinj të unazës së mesme. “Ne sot e kemi gjithë fuqinë edhe me konsensus me qeverinë qendrore për t’i bërë ligjet më të mira. Ne do të kalojmë te fatura e ujit, vlerën që ju keni rënë dakord më parë me administratorët. Kontributin e caktoni ju, ama vjeljen do e bëjmë ne. E vetmja mënyrë për ta zgjidhur këtë në kohë afatgjatë është që, siç kemi bërë me taksat e tjera, të ndryshojmë vendimin dhe për administrimin”. Kështu, shumë shpejt do të bëhet edhe ndryshimi i vendimit, që parashikon që të ardhurat për administrimin të jenë pjesë e detyr- imit total të faturës së ujit. Kjo lehtëson ndjeshëm punën e administratorit, duke shmangur kështu përballjen e tij me qytetarët kryeneçë, që dëshirojnë t’i ikin detyrimit. Por si do shkojnë të ardhurat tek administratori?! Në bazë të kontributeve që mblidhen për çdo apartament, përqindja e caktuar do të kalojë në numrin e llogarisë së pallatit që e menaxhon administratori e cila duhet të shkojë për investime e mirëmbajtje. Por, puna e tij nuk kufizohet këtu. Siç është thënë edhe më herët, ai do të ketë mundësi të vendosë sanksione për “të pabindurit”. “Për herë të parë do t’i japim të drejtë administratorit jo vetëm të vjelë të ardhurat që është dakordësuar nga vetë asambleja, por edhe të vendosë gjoba për drurin e shtrembër, atë që bën pis, ndot, shkatërron pronën publike”. Për ata që s’paguajnë gjobat, sanksionet do të rriten deri në bllokimin e llogarisë bankare. “Unë them që fuqizimi i administratorit me pushtetin për të vënë gjobë, pra të ketë titull ekzekutiv me të cilin nëse s’paguan fillon kamatëvonesa, e nëse s’paguhet shkojmë në gjykatë dhe me përmbarim i bllokojmë llogarinë bankare. Është ndoshta diçka radikale, por e nevojshme për atë përqindje të vogël ‘ drurësh të shtrembër’ që gjithsecili i ka te lagjja e vet”. Për këtë nismë, Veliaj kërkoi edhe ndihmën e banorëve, për të mos e lënë administrimin vetëm monopol të një personi. Duke u ndalur te hapësirat e përbashkëta, Veliaj foli për fondin e komuniteteve dhe mënyrën se si mund të përfitojnë banorët nga ai. Kusht mbetet caktimi i një administratori. “Sot kemi filluar me aplikimet e para, çdo fundmuaj do deklarojmë fituesit dhe do disbursojmë në numrin e llogarisë së pallatit shumën përkatëse. Nxitoni, përdoreni verën për një aktivitet të dobishëm”, apeloi kryetari. Për herë të parë, Bashkia vë në dispozicion 20 milionë lekë për investime në bashkëpronësi me banorët.