Marrëveshja, ngrihet Task- Forca për zgjedhjet
Në përbërje tre ministra të PS dhe katër ministra teknikë
Qeveria miratoi dje ngritjen e një Task Force të posaçme për të monitoruar përdorimin e administratës gjatë fushatës elektorale. Task Forca do të drejtohet nga zëvendëskryeministrja Ledina Mandija dhe do të ketë në përbërje të saj tre ministra socialistë dhe katër ministra teknikë, por edhe funksionarë të lartë të shtetit dhe drejtorin e Policisë së Shtetit. Në vendimin e qeverisë përcaktohet se punonjësve të administratës u lejohet të marrin pjesë në fushatë elektorale vetëm jashtë orarit zyrtar të punës dhe larg mjediseve te institucionit. Por edhe pse mund të marrin pjesë në fushatë, nëpunësve civilë nuk u lejohet të shprehin publikisht bindjet e tyre. Kjo do të thotë se ata janë të ndaluar të bëjnë fushatë për një kandidat, ose parti politike dhe po kështu janë të ndaluar të manifestojnë me pankarta, parulla apo çdo mjet tjetër të shkruar dhe të ekspozuar publikisht. “Task- Forca, në bashkëpunim me titullarët e ministrive dhe grupet e monitorimit, do të monitorojnë administratën shtetërore në drejtim të përdorimit të autoritetit shtetëror vetëm në përputhje me ligjin, duke mos lejuar përdorimin e burimeve njerëzore, financiare dhe logjistike të shtetit gjatë procesit zgjedhor, si dhe duke mos lejuar kryerjen e veprimeve dhe/ ose dhënien e premtimeve, favoreve apo moscenimin e të drejtave të shtetasve, si mekanizëm për favorizimin apo dhënien e votës një subjekti të caktuar politik”, thuhet në vendimin për ngritjen e task forcës. Gjithashtu kjo trupë e posaçme do të monitorojë edhe lëvizjet e nëpunësve të lartë shtetërorë ditën e zgjedhjeve. “Monitorimin e procesit zgjedhor, përfshirë ditën e votimit, në funksion të mospërfshirjes në të të zyrtarëve apo personave të tjerë që ndodhen në institucione shtetërore, përfshirë personat e burgosur, dhe marrjen e masave për ndëshkimin e atyre zyrtarëve që veprojnë në kundërshtim me ligjin. Pjesë e kësaj detyre është edhe monitorimi i lëvizjes së nëpunësve të lartë dhe të mesëm shtetërorë në qendër dhe qarqe apo bashki gjatë procesit zgjedhor”, thuhet në vendim. Vendimi i Këshillit të Ministrave pezulloi vendimin e mëparshëm të Kryeministrit Rama për ndalimin e administratës të përfshihet në zgjedhje.