Padia për fyerje, Nishani humb gjyqin kundër Veliajt
Gjykata e Tiranës rrëzon kërkesëpadinë e Presidentit
Presidenti i Republikës, Bujar Nishani, humbi dje një përballje gjyqësore me kryebashkiakun e Tiranës, Erion Veliaj.
Gjykata e Shkallës së Parë e kryeqytetit rrëzoi kërkesëpadinë e kreut të shtetit, i cili pretendonte se ishte dëmtuar moralisht dhe i ishte cenuar nderi e personaliteti nga një deklaratë televizive e Veliajt gati një vit më parë. Në këtë deklaratë Veliaj tha se Presidenti zhgënjeu publikun në mënyrën si vodhi pronën e Kishës Katolike në Elbasan. Presidenti kërkonte dëmshpërblim financiar në shumën simbolike 100 lekë të rinj. Vendimi përfundimtar i shqyrtimit të padisë për shkaktim dëmi të bërë nga ana e Presidentit Nishani u shpall paraditen e djeshme nga gjyqtarja Arjana Liço. Në përfundim të 17 seancave të shqyrtimit gjyqësor të kësaj kërkesëpadie, gjyqtarja vlerësoi se kërkimi i Nishanit duhej të rrëzohej. “Rrëzimin e kërkesë- padisë”, thuhej në dispozitivin e vendimit.
PADIA Presidenti i Republikës, Bujar Nishani, iu drejtua Gjykatës me një padi civile për shkaktim dëmi kundër Erion Veliajt më 19 maj 2016.
“Detyrimin e palës së paditur të më dëmshpërblejë për dëmin moral të pësuar prej cenimit të nderit dhe personalitetit në vlerën 100 lekë. Detyrimin e të paditu- rit të përgënjeshtrojë deklaratat e bëra duke publikuar me shpenzimet e veta në emisionin ‘ Opinion’ të TV Klan dhe mediat kombëtare vendimin e gjykatës”, thuhej në objektin e padisë të regjistruar me numrin 9499 në Gjykatën e Shkallës së Parë Tiranë.
Padia në fjalë u regjistrua pak ditë pasi Presidenti Nishani bëri një deklaratë publike nga Presidenca, ku thek- soi se: “Natyrisht që një njeri kushdo qoftë ai që vjedh ka vetëm një emër ‘ hajdut’, dhe unë besoj që shqiptarët nuk mund të kenë në zyrën e Institucionit të Presidentit të Republikës, shteti shqiptar nuk mund të ketë në krye të tij një njeri që është hajdut. Hajduti e ka vendin në qeli, e ka vendin përballë ligjit; hajduti dënohet sipas ligjeve të shtetit dhe kodeve përkatëse. Prandaj kjo është një çështje që nga sot i kalon për shqyrtim drejtësisë”, u shpreh Presidenti Nishani në konferencën e mbajtur më 12 maj.