"E vrava se do të spërkaste rrushin e helmoheshin dhitë"
Zbardhet dëshmia e autorit që qëlloi për vdekje me armë gjahu dy ditë më parë të moshuarin në Borsh.
Dëshmia e 57- vjeçarit Sokrat Xhuveli ka lënë të habitur edhe oficerët që e kanë marrë në pyetje, kur ai ka deklaruar se e kishte vrarë fqinjin pasi ai do spërkaste dhitë e mund t'i helmoheshin dy dhitë e tij. Sipas asaj që 57vjeçari ka deklaruar në polici, ngjarja ka ndodhur pas një grindjeje që ai e viktima Et'hem Brahimaj patën pasi ky i fundit nuk e ka dëgjuar për të mos spërkatur hardhitë e rrushit, pranë të cilave ndodhej kasollja e dhive të tij. "E vrava sepse donte të spërkaste rrushin dhe mund të më helmoheshin dhitë. Ai nuk më dëgjoi dhe ne patëm një grindje me njëri- tjetrin. Më pas mora armën dhe e qëllova në banesën e tij duke e vrarë. Nuk doja ta vrisja pasi më shumë po kërkoja ta trembja, por ai mbeti i vdekur, ka deklaruar Xhuveli. Ai akuzohet për vrasjen me dashje të fqinjit të tij, 78- vjeçarit Et'hem Brahimaj. Sipas të dhënave nga banorë të fshatit, rezulton se autori i krimit është një person që jetonte thuajse i vetëm. Pas divorcit, prej gati tri vitesh Xhuveli endej rrugëve të fshatit, ndërsa fëmijët i ka në emigracion. Sipas të dhënave, ai nuk kishte asnjë marrëdhënie as me të afërmit. Në Borsh njihej si konsumues alkooli dhe shumë herë madje kishte krijuar konflikte të çastit edhe me banorë të tjerë. Ndërkohë vikti- ma mësohet se ishte baba i gjashtë fëmijëve dhe në fshat njihej si një person jo problematik dhe i respektuar. Sipas Policisë, mes autorit dhe viktimës kishte edhe një lidhje krushqie, pasi mbesa e Xhuvelit është nuse në familjen e të ndjerit Brahimaj. Ngjarja e rëndë ndodhi dy ditë më parë, ku, pas një konflikti mes tyre, Xhuveli ka shkuar në shtëpi dhe ka marrë një armë gjahu. Më pas ai e ka qëlluar të moshuarin dy herë me armë gjahu, çka i ka shkaktuar edhe vdekjen e menjëhershme.