Rama me operatorët turistikë: Taksa 6%, më e ulëta në rajon
“Reforma në Drejtësi, ndihmë për ekonominë e punësimin”
Kryeministri Edi Rama gjatë një takimi me operatorët turistikë në qytetin e Përmetit deklaroi se falë mbështetjes së qeverisë në këtë sektor, Shqipëria ka taksën më të ulët në rajon.
“Taksa e turizmit u bë 6% tani dhe praktikisht e kemi më të ulëtën në rajon, sepse taksa e mëparshme ishte e rëndë. Shpresoj që do të na ndihmojë me formalizimin. Duke mos pasur më fshehje klientësh që flenë nëpër hotele. Energjia elektrike është ulur për familjarët, por është rritur për biznesin, është e vërtetë, por të gjitha hap pas hapi, sepse nuk mund të bëj çdo gjë përnjëherësh”, deklaroi Rama gjatë takimit me operatorët turistikë. Sipas kreut të qeverisë, një mbështetje e madhe për zhvillimin e turizmit në Shqipëri do të jetë edhe Reforma në Drejtësi dhe efektet që ajo do të japë. “E rëndësishme është që kemi mundësi t’i japim ekonomisë dhe punësimit një shtysë shumë të fortë në 4 vitet e ardhshme, sepse do të na ndihmojë shumë Reforma në Drejtësi. Ajo reformë në pamje të parë duket sikur nuk ka lidhje, por është 100% e lidhur me ekonominë. Çlirimi i peshës, ankthit, pasigurisë, tensionit që krijojnë gjykatat nga ideja se e nis biznesin, por nesër mund të humbash gjithçka, është çlirim shumë i madh”, theksoi kreu i qeverisë. Kryeministri Rama kujtoi se qyteti i Përmetit është shembulli më i mirë i efekteve që ka dhënë projekti i Rilindjes urbane. Sipas Ramës, para vitit 2013, operatorët turistikë kishin kapacitete, por nuk kishin turistë, ndërkohë që me zhvillimin e qytetit ky raport është përmbysur.
“Sapo ne kemi filluar zbatimin e projektit të Rilindjes urbane, menjëherë kanë filluar shenjat e lëvizjes në Përmet. Fluksi i turistëve që vijnë janë në rritje. Tani vjen inversi. Deri dje kishte kapacitet maksimal pritjeje, por nuk kishte fluks, tani fluksi kapërcen kapacitetin”, tha kreu i qeverisë. Rama u kërkoi operatorëve turistikë të mos funksionojnë të vetëm, por të ndërthurin bizneset e tyre për të krijuar një pamje të plotë për ata që vijnë në Shqipëri.