Mehmetaj e LSI- së: Shkarkimet janë shantazh ndaj administratës publike
Lëvizja Socialiste për Integrim i ka quajtur si hakmarrje dhe shantazh politik vendimet e ministrave teknikë për të shkarkuar drejtorët e LSI- së. Nënkryetarja e LSI- së, Kejdi Mehmetaj, tha dje se LSI-ja ka bërë kallëzim penal për shpërdorim detyre për ministren e PS- së, Milva Ekonomi, ministrin teknik të PD- së, Gazmend Bardhi, ministren e Arsimit, Xhuljeta Kërtusha, dhe zv. kryeministren Ledina Mandija. “Lëvizja Socialiste për Integrim ka bërë kallëzim për fillimin e ndjekjes penale për shpërdorim detyre të ministrave: Milva Ekonomi, Gazmend Bardhi, Xhuljeta Kërtusha dhe të zëvendëskryeministres Ledina Mandija, në cilësinë e kryetares së Task- Forcës së ngritur nga qeveria, që në shkelje flagrante të ligjit, në mënyrë arbitrare dhe në mungesë të plotë të transparencës, kanë nisur një fushatë hakmarrjeje dhe shantazhi ndaj punonjësve të nivele të ndryshme në administratën publike. Pikërisht për ta shpërdoruar Task-Forcën për hakmarrje politike, nuk është përfshirë në të asnjë prej ministrave që vijnë nga radhët LSI- së”, tha dje Mehmetaj. Sipas nënkryetares së LSI- së, të gjithë të shkarkuarit do të rikthen në postet e tyre pas zgjedhjeve të qershorit. “Duke theksuar se për LSI-në është i rëndësishëm zbatimi i ligjit, ne denoncojmë publikisht fushatën e hakmarrjes dhe të kërcënimit politik ndaj njerëzve të administratës publike, të cilët më 26 qershor do të kthehen të gjitha në vendet e tyre të punës, njësoj siç ndodhi me të gjithë ata që Lulzim Basha i largoi padrejtësisht nga puna para zgjedhjeve të vitit 2013 dhe që pas fitores së LSI-së u rikthyen të gjithë vendet e tyre të punës. Në emër të LSI- së ju bëj thirrje të gjithë punonjësve të administratës të larguar padrejtësisht nga puna, por edhe shumë të tjerëve që janë përfshirë në listat e zeza të marrëveshjes së errësirës, që të mos ndihen të frikësuar, sepse koha e hakmarrjes shtetërore për shkak të bindjes politike apo shprehjes së lirë të mendimit ka perënduar një herë e përgjithmonë”, tha nënkryetarja e LSI.
Për LSI- në është i rëndësishëm zbatimi i ligjit. Ne denoncojmë publikisht fushatën e hakmarrjes dhe të kërcënimit politik ndaj njerëzve të administratës publike, të cilët më 26 qershor do të kthehen të gjitha në vendet e tyre të punës