Zbulohet gomonia me 700 kg drogë në bord, do të trafikohej në Itali
VLORE- Sekuestrohen rreth 700 kg lëndë narkotike dhe një mjet lundrues, me të cilin do të trafikohej drejt shtetit italian. Operacioni i nisur prej disa ditësh në Vlorë në bashkëpunim nga Drejtoria e Policisë Kufitare dhe Migracionit, Drejtoria Vendore e Policisë, Reparti Delta Forcë dhe Guardia de Finanza ka bërë të mundur që pas kontrollit të ushtruar në zonën e lumit Vjosë të sekuestrohet lënda narkotike, e cila ishte bërë gati sipas policisë për t'u transportuar drejt brigjeve italiane. Gjatë mesnatës, pas një pune hetimore prej disa ditësh, por edhe në bazë të informacioneve të siguruara në rrugë operative, policia ka arritur të gjejë të fshehur në pyll në zonën pranë lumit të Vjosës një gomone, e cila ishte ngarkuar me drogë. Mjeti lundrues tip gomone është gjetur rreth 1 km larg grykëderdhjes së lumit Vjosë. Në brendësi të gomones u sekuestruan gjithsej 67 pako dhe katër çanta, të cilat pas peshimit rezultuan se ishte një sasi prej rreth 685 kg lëndë narkotike kanabis sativa. Shërbimet e policisë në bashkëpunim me njëra- tjetrën kanë vijuar edhe gjatë para- dites së ditës së shtunë, duke krehur zonën tokësore përreth, por edhe atë ujore, me qëllim kapjen dhe arrestimin e autorëve të implikuar në këtë veprimtari kriminale. Zona përreth lumit Vjosë mbetet edhe një nga terrenet ku trafikantët kanë tentuar të trafikojnë lëndë narkotike drejt Italisë edhe në periudha të tjera, ndaj mbetet sipas policisë një nga zonat më të kre- hura dhe të kontrolluara për goditjen e rasteve të trafikut. Ndërkohë, burime nga Policia e Vlorës kanë konfirmuar se deri më tani janë shoqëruar pesë persona për të marrë informacione dhe shkuar te zbardhja e ngjarjes, si dhe identifikuar se kujt i përkiste mjeti lundrues dhe lënda në të. Po dje policia ka ushtruar kontroll në fshatin Lapardha në Bashkinë Selenicë. Sipas të dhënave, blutë kanë konstatuar 3 parcela të mbjella pranë njëra- tjetrës më bimë narkotike, me gjatësi deri 15 cm, si dhe 48 fidanë të vegjël, të vendosur në kubikë. Nga hetimet ka rezultuar se lënda narkotike ishte e mbjellë në pronë private pranë zonës së quajtur Kodra e Likajve, tokë e cila ishte në pronësi të tre shtetasve, prej të cilëve një u arrestua dhe dy të tjerë u shpallën në kërkim.