Depresioni, vetëvriten tre persona vetëm në një ditë
Viktimat, dy gra nga Dibra e Fieri dhe një 55- vjeçar në Vlorë
Vetëm në 24 orët e fundit tre persona i kanë dhënë fund jetës në forma të ndryshme. Policia njoftoi dje se viktimë e depresionit është bërë një 25- vjeçare në Dibër.
Po për të njëjtin shkak janë vetëflijuar edhe një grua 46 vjeçe në Fier dhe një 55- vjeçar në Vlorë. Sipas të dhënave, ngjarja në Dibër ndodhi në fshatin Katund i Ri dhe viktima është shtetasja me inicialet S. N. 25vjeçaren e ka gjetur vëllai i saj, i cili ka shkuar në kasollen e bagëtive dhe është shokuar kur ka parë motrën të varur. Familjarët kanë njoftuar policinë, por nga këqyrja e trupit nuk janë konstatuar shenja dhune. Policia ka nisur hetimet dhe janë marrë në pyetje familjarët e vajzës për të zbuluar shkakun e ngjarjes, ndonëse paraprakisht flitet për gjendje depresioni të vajzës. Blutë nuk përjashtuan dyshimin se e reja mund të jetë vetëflijuar për shkaqe të tjera, siç mund të jetë edhe një lidhje e prishur e saj. Por kjo nuk konfirmohet zyrtarisht, pasi sipas të dhënave paraprake 25-vjeçarja vuante nga depresioni. Ndërkaq, një tjetër vetëflijim ndodhi në Fier. Policia bëri të ditur se viktima është 46vjeçarja me iniciale D. B., e cila është vetëhelmuar me fostoksinë në banesën e saj në fshatin Poro. Kanë qenë familjaret që e kanë gjetur në gjendje të rëndë, por edhe pse u transportua në spital ndihma e mjekëve nuk ka mjaftuar për ta mbajtur në jetë gruan 46- vjeçare. Policia bëri të ditur se shkak i ngjarjes dyshohet të ketë qenë depresioni ose gjendja e vështirë ekonomike. Një tjetër ngjarje e rëndë shokoi banorët e Vlorës dje për shkak se viktima u vetëhodh nga ballkoni i pallatit ku jetonte. Ngjarja ndodhi në lagjen "Pavarësia", ku viktima Fatmir Ruci, 55 vjeç, është hedhur nga kati i pestë i pallatit. Nga hetimet ka rezultuar se ai vuante prej vitesh nga depresioni. Ai jetonte i vetëm me motrën e tij, pasi ishte i divorcuar. Ngjarja ndodhi rreth orës 10: 40, ku sipas informacioneve të policisë 55-vjeçari Ruci është hedhur nga lartësia në një moment që ka qenë i vetëm në banesë. E motra e cila jetonte prej disa vitesh me 55- vjeçarin ishte larguar për momentin nga shtëpia kur ai ka ndërmarrë aktin vetëvrasës. Pas sinjalizimit të dhënë, policia ka mbërritur në vendngjarje dhe nisi hetimet. Pas informacioneve të marra, rezultoi se i ndjeri vuante nga depresioni dhe se kishte tentuar edhe një herë tjetër më parë për t'u vetëvrarë, duke u vetëhedhur nga banesa, por asokohe kishte arritur të shpëtonte. Mësohet se viktima jetonte vetëm me të motrën në një pallat në lagjen "Pavarësia", pasi rezultonte se ishte i divorcuar. Familjarët e tij jetojnë prej disa vitesh në Itali, ndërsa ai shpërndante gazeta nëpër qytet.