RAMA, META E BASHA
Shkresa, kreu i Drejtësisë shkarkon 8 zyrtarë të lartë
Ministri i ri i Drejtësisë, Gazmend Bardhi, ka firmosur dje shkarkimin dhe kallëzimin në prokurori të 8 zyrtarëve të lartë të Lëvizjes Socialiste për Integrim dhe Partisë Socialiste.
Ministri teknik ka referuar rastet për ndjekje penale, pasi zyrtarët e lartë të Zyrës së Regjistrimit të Pasurive së Paluajtshme, drejtuesit e burgjeve dhe Zyrës së Përmbarimit Gjyqësor. Nga detyra është shkarkuar dje Jetnor Krakulli, drejtor i Burgut të Fierit; Eduard Kurti, drejtor i Burgut Lezhë; Fatjon Fana, drejtor i Burgut 313 në Tiranë; Fatjon Kurti, drejtor i Burgut Burrel, po ashtu dhe Ahmet Bala, drejtor i Burgut të Rrogozhinës. Po dje u shkarkua nga detyra edhe Adriana Shehu, regjistruese në Zyrën Vendore të Sarandës; Ani Dyrmishi, regjistruese e Zyrës së Pasurive Vendore në Durrës dhe Suri Hoxha, kryetar i Zyrës së Përmbarimit Gjyqësor Durrës. “Ministri i Drejtësisë, z. Gazmend Bardhi, shkarkoi sot nga detyra 8 zyrtarë të lartë të Zyrës së Regjistrimit të Pasurive të Paluajtshme, sistemit të Burgjeve dhe Zyrës së Përmbarimit, si dhe ia referoi rastin e tyre Prokurorisë së Përgjithshme për veprën penale të përfshirjes në kundërshtim me ligjin në fushatën zgjedhore të një subjekti zgjedhor. Shkarkimi erdhi pas verifikimeve dhe inspektimeve të kryera nga strukturat e Ministrisë së Drejtësisë dhe Drejtorisë së Përgjithshme të Burgjeve, si dhe informacioneve të plota të marra, ku konstatohet përfshirja e këtyre zyrtarëve në fushatën zgjedhore në kundërshtim me ligjin, si dhe neglizhencë e theksuar në kryerjen e detyrave”, thuhet në njoftimin e Ministrisë së Drejtësisë.
PEZULLIMI Po dje Gazmend Bardhi ka kërkuar pezullimin nga detyra të sekretares së Përgjithshme të Ministrisë së Drejtësisë. Juliana Hoxha është kandidate për deputete e Partisë Socialiste, njëkohësisht vazhdon dhe detyrën në ministri. “Ministri i Drejtësisë i ka kërkuar zyrtarisht Departamentit të Administratës Publike që të zbatojë Kushtetutën, Kodin Zgjedhor dhe ligjin për nëpunësin civil, dhe të pezullojë nga detyra sekretaren e Përgjithshme të Ministrisë së Drejtësisë, znj. Juliana Hoxha, e cila ushtron funksionin në kundërshtim flagrant me ligjin, që nga data 29 prill 2017, për shkak se është kandidate për deputete në Qarkun e Tiranës, me subjektin zgjedhor Partia Socialiste e Shqipërisë. Për këtë arsye, ministri i Drejtësisë, z. Bardhi, ka informuar zyrtarisht Kryeministrin dhe është në pritje të ndërhyrjes së tij për zbatimin e plotë të ligjit”, thuhet në njoftimin për shtyp. DENONCIMET Në njoftimin zyrtar të Ministrisë së Drejtësisë kërkohet mbështetja e qytetarëve për të denoncuar rastet e zyrtarëve të administratës publike, të cilët angazhohen në fushatën elektorale. “Ministria e Drejtësisë gjen edhe një herë rastin të inkurajojë çdo qytetar që të denoncojë të gjitha rastet e përfshirjes në fushatë apo përdorimit të funksionit publik në favor të një subjekti zgjedhor, si dhe garanton qytetarët jo vetëm për ruajtjen e anonimatit, por edhe për ndjekjen me seriozitet maksimal të këtyre rasteve”, thuhet në njoftim.