Sulmi terrorist, mes 12 të arrestuarve edhe 4 femra
Gjatë arrestimeve, të shtëna me armë zjarri e shpërthime
Policia britanike ka arrestuar 12 veta, përfshirë katër femra gjatë një bastisjeje në agim në një bllok banesash në “Barking”, ku kishte jetuar një nga terroristët e “London Bridge”.
Një dëshmitar tha se një i dyshuar që u përpoq të ikte u qëllua, ndërsa të tjerë raportuan se kishin dëgjuar të shtëna me armë zjarri dhe shpërthime, ndërsa policia hynte në zonë në orën 07: 00 të mëngjesit, të dielën. Disa njerëz u fotografuan të shtrirë barkas duke u arrestuar, ndërsa të tjerë u shoqëruan nga banesat e tyre bashkë me katër femra. Arrestimet ishin të parat nga policia që pas sulmit, nga i cili u vranë shtatë veta dhe u plagosën 48 të tjerë, 21 nga të cilët në gjendje kritike. Një bastisje e dytë nga oficerët e armatosur u krye në “Barking Road”, “East Ham”, në orën 15: 30. Policia londineze nuk ka komentuar nëse operacioni ishte i lidhur me sulmin terrorist të së shtunës dhe nuk ka dhënë detaje të tjera rreth bastisjes. Dëshmitarët thanë se së paku tre veta ishin marrë nga vendi i ngjarjes. Një prej të dyshuarve të arrestuar ishte përpjekur të arratisej nga dritarja. Ai u arrestua vetëm pasi oficerët e armatosur i drejtuan armët e tyre dhe e kërcënuan të qëllonin. Dëshmitari Malik Rouf, 30 vjeç, kishte thënë për “MailOnline” se “Nuk e di nëse ai ishte i frikësuar apo diçka tjetër, por dukej mjaft i dëshpëruar. Dukej mjaft i vendosur për të ikur”. I dyshuari, i cili tha se ishte me ngjyrë dhe në të njëzetat, ishte kthyer përsëri në banesën e tij nga dritarja, ku u arrestua së bashku me një burrë tjetër me ngjyrë. Oficerët e armatosur kishin zbritur nga tri makina të pashënuara të policisë dhe vërshuar nëpër banesa në zonën e të dyshuarve. Të dy të dyshuarit u morën zvarrë në një furgon dhe u larguan. Ndërkohë, oficerë të Mjekësisë Ligjore kanë pastruar skenën në “London Bridge” dhe “Borough Market”, ku tre terroristë lanë një gjurmë vdekjeje dhe shkatërrimi kur sul- muan me një furgon dhe me thika. Xhihadistët, të cilët mbanin jelekë falsë nga ata që përdoren për t’u mbushur me eksplozivë nga sulmuesit vetëvrasës, shtypën me furgon rreth 20 këmbësorë, ndërsa ecnin me shpejtësi në Urën e Londrës. Më pas, ata braktisën automjetin në afërsi të “Borough Market”, ku nisën sulmin me thika, duke qëlluar kë t’u dilte para në lokale dhe treg.