Meta ironi me Ramën e Bashën: LSI nuk i ha presionet nga Tomi e Xherri

Presidenti i zgjedhur, Ilir Meta, i krahasoi dje Kryeministrin Rama dhe kreun e PD- së, Basha, me Tomin dhe Xherrin, dy personazhet e animuar për fëmijë. Ish- kreu i LSI u shpreh i sigurt se kjo parti do të provohet në qeverisje, pas provave që ka dhënë sipas tij për stabilitetin dhe integrimin. Zyra e shtypit e LSI nuk e shpërndau videon e mesazhit të Metës, por shigjetat që lëshoi ndaj Edi Ramës dhe Lulzim Bashës ai i formuloi kështu: "Këto lloj presionesh që LSI nuk i ha, se nuk i ka ngrënë nga Sali Berisha njëherë e një kohe, jo t'i hajë nga Tomi e Xherri sot, nuk shkojnë. Ju e dini shumë mirë që çdo demokrat, për kryeministër, midis Edi Ramës dhe Petrit Vasilit, do votonte Petrit Vasilin. Ju e dini gjithashtu që, çdo socialist, midis Lulzim Bashës dhe Petrit Vasilit, do të votonte përsëri Petrit Vasilin për kryeministër. Kështu që, me sa duket, unë pata jo vetëm mundësinë të jem Presidenti i parë i propozuar nga LSI, por ja që qëllojnë dy gëzime bashkë, do kem mundësinë që një nga dekretet e para që do kem, do të jetë të firmos Petrit Vasilin kryeministër", deklaroi Meta. Ai tha se të rinjtë janë shansi për ta ndryshuar politikën dhe se ata duhet të kenë besim tek e ardhmja e tyre në Shqipëri. "LSI forcë e parë do të thotë drejtim i ri për Shqipërinë. Fuqia e LSI- së është te rinia dhe te fjala e dhënë e fjala e mbajtur. Duam që të rinjtë ta ndiejnë që ky është vendi i tyre, ata janë shansi për ta ndryshuar këtë politikë, që të gjithë të rinjtë të kenë besimin tek e ardhmja e këtij vendi, të investohen për realizimin e një ndryshimi të madh, ta ndiejnë që kanë një shans për t'u arsimuar, për t'u punësuar këtu dhe për të krijuar familjet e tyre", tha Meta.