Ish- të përndjekurit, 320 emrat që marrin këstin e dytë

Dëmshpërblimi për trashëgimtarët, 3 muaj afat për dokumentet

Në të njëjtën kohë me ndarjen e këstit të tetë për kategorinë parësore, Ministria e Financave ka nisur shqyrtimin e dosjeve për ish- të përndjekurit që nuk jetojnë dhe përfitues janë trashëgimtarët.

Dje është publikuar lista e radhës me 70 dosjet, të cilat janë marrë në shqyrtim. Gazeta boton sot emrat e 320 trashëgimtarëve që kanë gati këstin e dytë, por duhet të dorëzojnë pranë sektorit të pagave dhe dëmshpërblimeve kopje të letërnjoftimit, numër llogarie, certifikatë vdekjeje, certifikatë e trungut familjar, dëshmi trashëgimie dhe prokurë. "Të gjithë trashëgimtarët e ish- të dënuarit politikë duhet të konfirmojnë në bankat përkatëse numrin e llogarisë bankare nëse është aktiv. Nëse nuk është aktiv, të hapin një numër të ri llogarie bankare, të cilin ta dërgojnë në sektorin e pagave dhe dëmshpërblimeve, duke shënuar numrin e dosjes të ish- të dënuarit politikë", ka sqaruar më herët ministria. Për depozitimin e këtyre dokumenteve familjarët e të dënuarve kanë 3 muaj afat. Sikundër ka ndodhur përgjatë 3 viteve të fundit, procesi për këtë kategori ka ecur me ritme tejet të ngadalta. Një ndër arsyet që ka sjellë bllokim të pagesave, krahas pamjaftueshmërisë së fondit, ka qenë edhe fakti që për disbursimin e çdo pagese duhet që secili prej familjarëve të plotësojë dosjen. Kjo ka sjellë vonesa në ndarjen e kësteve. Këtë vit janë 6 milionë dollarë të vëna në dispozicion nga buxheti i shtetit për kategorinë e trashëgimtarëve. Deri më tani mësohet se janë ndarë vetëm 70 milionë dollarë.