Blinin në dyqane me euro false, 3 në pranga
TIRANE - Tre persona janë arrestuar paraditen e djeshme gjatë një operacioni të organizuar nga oficerët e Antikrimit Ekonomik të Policisë së Tiranës, të dyshuar për falsifikim kartëmonedhash. Arrestimi i tyre është bërë gjatë operacionit të koduar "Euro", që u zhvillua në bashkëpunim edhe me Policinë e Durrësit. Aktiviteti i tre të dyshuarve zhvillohej mes Durrësit dhe Tiranës dhe ndaj tyre ishin bërë dhjetëra kallëzime, nga pronarë të bizneseve të vogla, ku ata kishin bërë blerje me euro të falsifikuara. Burime zyrtare të Policisë së Tiranës thanë se kanë vënë në pranga shtetasit Kliton Nanushi, 35 vjeç, banues në Tiranë, i dënuar më parë për shfrytëzim prostitucioni, Juljan Mehmeti, 27 vjeç, banues në Përmet dhe Kleart Kalemi, 19 vjeç, banues në Tiranë, i dënuar me parë për vjedhje. Këta persona dyshohen se përgjatë dy muajve të fundit në dyqane të ndryshme, pika karburanti dhe lokale në qytetin e Tiranës dhe të Durrësit, bënin pagesa me kartëmonedha të prerjeve 50 euroshe të dyshuara si të falsifikuara. Në momentin e arrestimit këtyre shtetasve u janë gjetur me vete 500 euro, të dyshuara si të falsifikuara. Policia tha se në cilësinë e provës materiale janë sekuestruar 10 kartëmonedha të prerjeve 50 euroshe, 3 kartëmonedha të prerjeve 5 mijë lekëshe dhe 2 kartëmonedha të prerjeve 1 mijë lekëshe, që dyshohen të jenë të falsifikuara dhe janë dërguar për ekzaminim. Gjithashtu, atyre iu gjet me vete edhe thikë me palosje që përmbushte kushtet e armës së ftohtë, me mbishkrimin "Stainless", si dhe iu sekuestruan edhe 2 aparate telefonike celularë të markave të ndryshme, si dhe 2 karta SIM. Burime nga grupi hetimor thanë se hetimet për identifikimin e arrestimin e tyre kanë nisur rreth një muaj e gjysmë më parë, pas disa denoncimeve që ishin bërë në Policinë e Tiranës dhe të Durrësit. Thuajse çdo 2- 3 ditë bëhej një denoncim në Polici, ku deklarohej se një person i identifikuar kishte blerë me euro false. Tre të arrestuarit vepronin veç njëritjetrit, por fitimet i ndanin bashkë. Identifikimi i tyre është bërë duke përdorur metodat speciale të hetimit. Ndërsa momentalisht Policia po heton për mënyrën se si i përftonin ata kartëmonedhat false, apo bashkëpunëtorë të tjerë që mund të kenë.