Hasi: Ja pse më besoi mua presidenti i Olimpiakosit
Besnik Hasi "pushton" Greqinë. Prej tri ditësh në mediat sportive helene, por jo vetëm, flitet për ish- kapitenin e Shqipërisë, që sot do të prezantohet si trajneri i ri klubit gjigand, Olimpiakos. Kampionët në fuqi të Greqisë sfiduan çdo paragjykim dhe i besuan gjakovarit pankinën e një klubi prestigjioz, që pak vite më parë e ka drejtuar edhe trajneri aktual i Barcelonës, Ernesto Valverde. "Panorama Sport" zbuloi tri ditë më parë se Hasi do të ketë një pagë neto prej 600 mijë eurosh në sezon për një kontratë 2- vjeçare me opsion rinovimi. Përpara se të bëjë prezantimin tek Olimpiakosi, ish- trajneri i Anderlehtit dhe Legias së Varshavës ka folur dje për portalin belg "voetbalkrant. com". Hasi ka treguar arsyet pse presidenti i Olimpiakosit, Evangjelos Marinaqis, i besoi pankinën e kuqe. "Pas takimit që bëra me presidentin Marinaqis, më ka dhënë dy arsye pse ai donte të më besonte stolin e Olimpiakosit. U ndjeva i lumtur për besimin që kishte tek unë. Ai nuk dëshironte që Olimpiakosi të përsëriste edicionin e kaluar, kur mbeti jashtë fazës së grupeve të Ligës së Kampionëve. Gjithashtu, një arsye pse më besoi, ishin eksperiencat e mia me dy klube të mëdha në Europë si Anderleht dhe Legia e Varshavës. Unë e di që presioni është i madh, pasi synimet e Olimpiakosit janë të larta. Më është bërë e qartë se duhet të fitoj patjetër titullin kampion në Greqi, gjithashtu Kupën e ligës dhe të shkoj sa më lart të jetë e mundur në Champions. Këtë presion e kam pasur edhe me Anderlehtin dhe ia kam dalë. Kërkesat kanë qenë të njëjta për mua, kështu që besoj se do të kem sukses edhe në Greqi. Fundi i muajit korrik do të jetë shumë i rëndësishëm për mua dhe ekipin, pasi atëherë luhet faza ' play- off'", - ka treguar Hasi.