Monitorim nga ajri në Tiranë, s'gjendet kanabis deri në Elbasan
TIRANE - Policia e kryeqytetit në kuadër të një plani operacional për parandalimin, evidentimin, goditjen e kultivimit dhe trafikimit të lëndëve narkotike bëri dje monitorim nga ajri dhe toka të territorit. Policia tha se gjatë ditës së djeshme u monitorua dhe u kontrollua zona e fshatrave: Në njësinë administrative Dajt, në pjesën pyjore të fshatit Priskë e Madhe, në kufi me fshatin Gurrë, Parku Kombëtar i malit të Dajtit deri te vilat qeveritare, fshati QafëMollë deri te rezervat e shtetit, fshati Shkall, fshati Murth, fshati Dershen dhe fshati Selb. Po kështu, në njësinë administrative Zall- Bastar, fshati Bullcesh, deri në afërsi të liqenit të Bovillës, vendi i quajtur Kodër Lucë, fshati Zgurë deri te lumi në kufi me territorin e Krujës, fshati Gjepal dhe Mal Gjepal, fshati Vilëz dhe Mal Vilëz, fshati Mner dhe Mner i Sipërm, fshati Bastar Murizë, fshati Bastar i Mesëm, fshati Selitë e Malit, fshati Muricaj. Edhe në njësinë administrative Shën Gjergj dhe fshatrat e saj, por edhe te liqenet deri në kufi me zonën e Librazhdit, fshati Bizë dhe vendi i quajtur Liqenet e Bizës deri në kufi me zonën e Librazhdit, vendi i quajtur Stani i Dukëve në zonën e fshatit Bizë, fshati Srep, e gjithë zona e pyllëzuar në dy anët e lumit, i cili shkon në fshatin Urë, fshati Burimas dhe fshati Shën Gjergj deri te mali me gropa, fshati Dom dhe fshati Derje, si dhe fshati Façesh. "Gjatë monitorimit dhe kontrollit të zonave, nuk u evidentua asnjë parcelë e kultivuar me bimë narkotike", tha policia.