Berisha: S’mund ta bësh përgjegjës Metën për mashtrimet e Ramës

Ish- kryeministri Sali Berisha nuk e cilëson përgjegjës kreun e Kuvendit, Ilir Meta, për keqqeverisjen, pasi sipas tij mashtrimet kanë qenë të Edi Ramës. Në një intervistë për “ABC NEËS”, Berisha në kulmin e akuzave të PD- së ndaj LSI- së ka zbutur tonet ndaj ish- kreut të kësaj force politike, Ilir Meta. “Sulmet i ka më të strukturuara ndaj Edi Ramës, Ilir Metën ai nuk mund ta bëjë përgjegjës për programin e qeverisë, nuk mund t’i thuash Ilir Metës përgjegjës për mashtrimet e Edi Ramës. Nuk premtoi Meta 300 mijë vende pune, heqjen e TVSH për ushqimet, rrogën e 13, barazimin e pensionit të qytetit me fshatin, të gjitha këto janë premtimet e Ramës. Basha synon të jetë kryeministër i ardhshëm i vendit, ai ka programin e tij me të cilin do të bindë shqiptarët. Njeriu, i cili ka probleme me identitetin nuk di se ku përplaset, kjo qëndron në biologji. Kjo qëndron edhe në politikë. E sheh që tezat e Lulzim Bashës po ngjisin gjithnjë e më shumë. Socialistët janë të lënduar me Edi Ramën sepse u mashtruan, sepse s’u tregon dot asgjë se çfarë ka bërë, as shkolla, as rrugë, asnjë zhvillim madhor, as se çfarë të bëjnë në të ardhmen dhe mbi të gjitha socialistët janë të revoltuar për marrëveshjen që nënshkroi Lulzim Basha”, deklaroi Berisha. Ishkryeministri hodhi poshtë një koalicion mes PS e PD pas zgjedhjeve, por tha se nuhat që Rama po e përgatit Bashën për kryeministër. “Me çfarë nuhas unë politikisht Edi Rama ka pranuar Bashën kryeministër. Nëse e ndjek fushatën e tij, ai në mënyra nga më të ndryshmet e ka pranuar atë për kryeministër. Ai po përgatit dhe socialistët për dorëzimin e vetes”, thekson Berisha.