Pakt PD- PS edhe në KQZ, i heqin numëruesin LSI- së
Do e ndajmë PDIU në 45 ZAZ. Përfaqësuesi i LSI braktis mbledhjen, Veleshnja: E turpshme
Marrëveshja mes Partisë Socialiste dhe Partisë Demokratike ka "penalizuar" dje për herë të parë Lëvizjen Socialiste për Integrim në Komisionin Qendror të Zgjedhjeve.
Anëtarët e zgjedhur nga opozita dhe nga Partia Socialiste janë bërë bashkë kundër LSIsë, duke i hequr të drejtën "ekskluzive" që LSI ka patur në zgjedhjet e 2013 për të emëruar numëruesin e tretë në të gjitha tavolinat e numërimit në 90 Zonat e Administrimit të Zgjedhjeve në të gjithë Shqipërinë. Sipas vendimit të djeshëm, Lëvizja Socialiste për Integrim do ta ndajë numëruesin e saj me Partinë Drejtësi, Integrim dhe Unitet. Të dy forca në koalicionin e maxhorancës sipas argumentimit të KQZ- së kanë të drejtë të marrin pjesë në short për të caktuar vendet e numërimit ku do të kenë anëtarin e tretë. Shorti do të hidhet në bazë të numrave tek apo çift. Në total janë 90 Zonale të Administrimit të Zgjedhjeve, dhe mes LSI dhe PDIU do të hidhet shorti që në Vendet e Numërimit për të ndarë mes tyre 45 VNV me numër çift dhe 45 me numër tek. Po dje KQZ vendosi që anëtarin e katër të numërimit të votave në gjithë vendin ta ketë partia republikane, si forca e dytë e opozitës. Për këtë vendim kanë votuar pro, kreu i KQZ, Klement Zguri, nënkryetari, Denar Biba, anëtarët e propozuar nga PD, Vera Shtjefni, Hysen Osmanaj, dhe anëtarët e propozuar nga PS, Bledar Skenderi dhe Edlira Jorgaqi. Ndërkohë që i vetmi që ka votuar kundër ka qenë përfaqësuesi i LSI-së, Gëzim Veleshnja. Ky i fundit është çuar nga tavolina e mbledhjes i revoltuar me kolegët e propozuar nga PS dhe PD.
DEBATI
Gjatë mbledhjes përfaqësuesi i LSI- së, Gëzim Veleshnja e ka quajtur vendimmarrjen si të turpshëm dhe në kundërshtim me Kodin Zgjedhor. Ai propozoi që anëtari i katërt në grupet e numërimit të ndahej mes Partisë Republikane dhe Partisë Dretjësi Integrim dhe Unitet. "Çfarë do vendimi të marrim ne sot, atë do ta marrim në kundërshtim me Kodin Zgjedhor dhe ky vendim i marr nga KQZ jo vetëm do të jetë antiligjor, por dhe do të ishte qesharak. Ishallah bie ndonjë shi i madh dhe ka ndonjë përmbytje ta marrë arkivën e KQZ- së e ta çojë ne det se do na tallin rëndë ama ata që vijnë pas nesh. Unë propozoj që KQZ të hedh shortin për anëtarin e katërt të GNV- të mes partive të opozitës, midis PDIU-së dhe PR- së", tha dje Veleshnja.
Kreu i KQZ-së, Klement Zguri, theksoi se LSI- ja dhe PDIU- ja janë parti në maxhorancë, ndaj edhe anëtarin e tretë të numërimit të votave duhet ta ndajnë mes tyre. "Numëruesi i tretë që i përket maxhorancës qeverisëse të jetë mes PDIU- së dhe LSI- së. Nëse ne do të gjykonim që PDIU-ja do të ishte në opozitë, do të ishte pjesë e ZAZ- ve. Por me 7 vota pro, asnjë kundër, është gjykuar që kjo parti i përket shumicës parlamentare dhe në opozitë ka mbetur PR- ja, që kishte të drejtën për të propozuar një anëtar. Po i referohem një standardi të KQZ-së, nuk mund të ketë dy standarde zgjedhore", tha dje Zguri.