Shkeljet në burgje, shkarkohet drejtori i Vlorës e Fushë- Krujës

TIRANE - "Vala" e shkarkimeve të drejtorëve të disa burgjeve në vend, nisur disa ditë më parë, ka vijuar dje me dy emra të tjerë. Përmes një njoftimi zyrtar, Ministria e Drejtësisë bëri të ditur shkarkimin nga detyra të drejtorit të Institucionit të Ekzekutimit të Vendimeve Penale Vlorë, Bashkim Habilaj, si edhe drejtorin e IEVP Fushë- Krujë, Albert Malaj. Urdhri i shkarkimit të tyre, i firmosur nga ministri i Drejtësisë, Gazment Bardhi, kishte si motivacion braktisjen e detyrës dhe keqmenaxhimin e institucionit. Sipas MD, vendimmarrja për shkarkimin nga detyra të titullarit të burgut të Vlorës ka ardhur pas informacioneve të marra nga ana e Drejtorisë së Përgjithshme e Burgjeve, e cila ka konstatuar se Habilaj, pa asnjë arsye të përligjur dhe pa asnjë njoftim, nuk paraqitet në detyrë prej disa ditësh. Kjo sjellje përbën braktisje të detyrës dhe është administrativisht dhe penalisht e dënueshme. "Kjo sjellje përbën braktisje të detyrës dhe është administrativisht dhe penalisht e dënueshme", theksonte M. D. Në lidhje me shkeljet e vërejtura në burgun e FushëKrujës, MD pohonte se drejtori Malaj nuk ka menaxhuar në mënyrë efektive stafin nën varësinë e tij, ku janë vërejtur mungesa të pajustifikuara; ka lejuar, nëpërmjet mosveprimit, futjen e sendeve të ndaluara në institucion, ku përfshihen jo vetëm telefona celularë, por edhe pije të ndryshe alkoolike; ka lejuar, nëpërmjet mosveprimit, shkeljen e rregullave mbi oraret e regjimit të brendshëm, duke shkaktuar kaos në institucion, si dhe duke rrezikuar sigurinë; ka shkelur rregullat mbi kontraktimin e operatorëve tregtar që veprojnë brenda IEVP; si dhe ka shkelur rregullat e takimeve të lejuara midis të burgosurve dhe familjarëve të tyre.